Хаврын чуулган эхлээд талдаа л орж байна. Хувилбал 60 орчим хувьдаа дөхөж явна гэж хэлж болно. Угаас намар эхэлж, цагаан сарын өмнө өндөрлөдгийг нь намрын, хавар эхэлж наадмын өмнө завсарладгийг нь хаврын ээлжит чуулган хэмээн яриад заншчихаж. Албан хэллэгт ч ийн хэлэгддэг.     дөнгөж л талаасаа  өнгөрч байна.  Энэ удаагийн хаврын ээлжит чуулган гуравдугаар сарын 15-ны өдөр эхлэн 75-аас доошгүй ажлын өдөр чуулж, ойролцоогоор наадмын өмнө буюу зургаадугаар сарын 27-ны баасан гарагт хаалтаа хийх төлөвтэй байгаа.

Тэгэх нь ээ, өнөөдөр УИХ-ын дарга Д.Амарбаясгалан чуулганаар хэлэлцэх асуудал бага байгаа тул яаравчлах шаардлагагүй. Өнөөдөр хуралдахгүй гэх хариуг улст төрийн сэтгүүлчдэд өгсөн гэнэ. Ойлгохыг хичээж байна л даа. МАН-ын Удирдах зөвлөл хуралдаж, Ерөнхий сайдын асуудлыг шийдэх, Бага хурлаа товлох гээд ажил арвин бийг. Гэхдээ чуулган бол улс орны асуудал, намын хурал хоёрдугаар асуудал гэдгийг сануулах нь зүйтэй байх.

Миний л санаж буйгаар Засгийн газраас өргөн барьсан цахим мөрийтэй тоглоом, бооцоот таавар,төлбөрт уралдааныг бүхэлд нь хориглосон хууль санаачилсныг баталснаас өөр олигтой юм санаанд орохгүй нь ээ.  Зөвшөөрлийн тухай хууль, Эрүүгийн хууль, Зөрчлийн тухай хуульд нэмэлт, өөрчлөлт оруулах тухай хуулийн төслийг эцэслэн баталлаа. Ингэснээр Эрүүгийн хуульд заасан нэмэлт, өөрчлөлтийн хүрээнд цахим мөрийтэй тоглоом, бооцоот тоглоом, төлбөрт тааврыг зохион байгуулсан, мөн энэ төрлийн гэмт хэргийг зохион байгуулахад өөрийн данс, утасны дугаар, цахим мөнгө, цахим хаяг зэргээ ашиглуулсан “Агент”-уудад эрүүгийн хариуцлага тооцох эрх зүйн орчин бүрдсэн нь талархууштай ажил мөн үү гэвэл мөн. Цадигаа алдсан цахим залиланг цэгцэлж, Зөрчлийн тухай хуульд оруулсан өөрчлөлтөөр төлбөрт таавар, бооцоот тоглоом, мөрийтэй тоглоомыг сурталчилж, хүүхэд, залуучуудыг энэ төрлийн тоглоом тоглоход уриалан дуудсан үйлдэлд зөрчлийн хариуцлага оногдуулах нөхцөл бүрдсэнд нийгэм тэр чигтээ талархаж байгаа нь ч бас үнэн.

Гэхдээ хаврын чуулган нээлтээ хийх үест УИХ-ын дарга Д.Амарбаясгалан, анх удаа 126 гишүүнтэй байгуулагдсан парламент бүрэн эрхийнхээ хүрээнд гурван зүйлийг чухалчилж ажиллана гэдгээ зарласан. Санаж байгаачлан

                   Нэгдүгээрт, хүн төвтэй хуулийн орчныг бий болгох,

                   Хоёрдугаарт, хууль цаг хугацаанаасаа хоцордоггүй байх нөхцөлийг бүрэн хангах,

                   Гуравдугаарт, хууль иж бүрэн зохицуулалтаа хийж чаддаг байх асуудалд төвлөрч ажиллахаа зарласан билээ.  Ташрамд сануулахад, Монгол Улсын Их Хурлын 2025 оны хаврын ээлжит чуулган 2025 оны гуравдугаар сарын 17-ны өдрийн 10 цаг 00 минутад 74 гишүүн буюу 58.7 хувийн ирцтэйгээр эхэлснээс инагш ирцийн асуудал эргэлзээ дагуулсаар өнөөг хүрсэн шүү. Дутуу, сэтгэлгүй 126 гэх гоочлол гэх үү голох хандлага байсаар байсан, байх ч болно. 

Атал одоо арай өөр, илүү чухал асуудал тулгарлаа. Чуулганыг хуралдуулахаа больё гэх нь ёсзүйд нийцэх үү. Хүлээж байна. Хуулийн цаг хугацааны хоцрогдолыг богино хугацаанд засч залруулж, шинэчилж ажил тулгамдаад байна. Хамгийн наад зах нь электрон тамхитай холбоотой хуулийн зохицуулалт, цахилгаан дугуйтай холбоотой асуудал ч байна. Өөрийнх нь хэлссэнчлэн хууль батлагдаад таван жил тутам шинэчлэлт хийдэг байх бодлого ч үгүйлэгдэж байна.

Цаашилбал, Хөрөнгө оруулалтын тухай хуулийн шинэчилсэн найруулга,  Нийтийн албан тушаалтны хууль бус хөрөнгийг хураан авах, нөхөн төлүүлэх тухай хуулийн төсөл, Гэр бүлийн тухай хуулийг шшинэчлэн найруулах шаардлага, Хүүхэд хамгааллын асуудлаа хөдөлгөөнд оруулж, бодит нөхцөлд тохируулан сайжруулахаас эхлээд хийх, хэлцэх, сайжруулахыг хүлээж байна, нийгэм. Балай юм, байнгын ажиллагаатай парламентыг ингэж гацааж болдог юм уу?  Бид сайхан улс орондоо сайхан амьдармаар байна. Яаралтай хэлэлцэх асуудал байхгүй ч гэх шиг... Юу вэ, харин...