УИХ-ын чуулганы үдээс хойших нэгдсэн хуралдаан эхэллээ. Хуралдаанаар Төр, хувийн хэвшлийн түншлэлийн тухай хуулийг хэлэлцэж байна. Хуулийн төсөл батлагдсанаар төр, хувийн хэвшлийн түншлэлийн талаарх Монгол Улсын үнэлгээ олон улсад сайжирч, гадаад, дотоод хөрөнгө оруулалт, олон улсын байгууллагуудын хамтын ажиллагаа нэмэгдэж, цаашлаад үндэстэн дамнасан дэд бүтцийн төслүүдийг хэрэгжүүлэх боломж нээгдэнэ гэж төсөл санаачлагчид үзжээ. 

Хэлэлцэж буй асуудалтай холбогдуулж гишүүд асуулт асууж, хариулт авч байна.

УИХ-ын гишүүн Т.Доржханд: Хувийн секторт гэрээний үндсэн дээр төрийн ажил үйлчилгээ хийх байдлаар төрийн албан хаагчдыг цөөлж, төрийг жижиглэж байна. Тэгэхээр төрийн үйлчилгээг гэрээний үндсэн дээр урт хугацаанд олгодог байх хэрэгтэй. Олон улсын жишигт нийцсэн гэж сайхан худал хэлж байна. Ийм юм цаашаа явахгүй. Авч явж хэрэгжүүлэх байгууллагынхаа бүтцийг тодорхой хэлмээр байна. Төсөв дээр тойрог, сум болгон дээр баахан Соёлын төв өргөө байна. Гэтэл жилд хэдхэн удаа ашигладаг. Хамгийн их эрх мэдэлтэй хүн буюу сахиул нь дуртай үедээ Соёлын төвөө онгойлгож, партидаж байна. Үүнийгээ бид хувийн секторуудад гэрээний үндсэн дээр өгөөд, зардлаа хэмнэж болох уу?.

БОАЖ-ын дэд сайд Г.Түвдэндорж: Төр хувийн хэвшлийн түншлэлийн тухай хуулийн гол үндсэн зорилго, концевц, агуулгыг Т.Доржханд гишүүн зөв тодорхойллоо. Одоо хүчин төгөлдөр мөрдөгдөж байгаа концессын хууль хэтэрхий ерөнхий агуулгатай. Томоохон төсөл хөтөлбөрүүдийг хэрэгжүүлэх боломжгүй байсан. Харин энэ хуулиар төрийн байгууллагуудын чиг үүргийг маш нарийн гаргаж өгсөн. Хувийн хэвшлийн оруулж байгаа хөрөнгө оруулалтын эрсдэлийг ч маш сайн зааж тусгасан байгаа. Төр хувийн хэвшлийн түншлэлийн төвийг Эдийн засаг, хөгжлийн яамны дэргэд байгуулж байгаа.

Ажлын хэсгийн ахлагч, УИХ-ын гишүүн Ц.Цэрэнпунцаг: “Долоо хэмжиж нэг огтол” гэдэг шиг хэрэгжүүлэх төслийн процессийг их нарийн зааж өгсөн. Хамтрагчдаа гэрээний дагуу хянаж ажиллахыг нарийн заасан өмнөх хуулиас сайн. Өмнөх концессын хуулийн сөрөг үр дагавар энэ хуулинд гарахгүй байх. Хувийн хөрөнгө оруулагч, компаниудад зориулж энэ хууль бичигдээгүй. Заавал том хөрөнгө оруулалт шаардсан төсөл гэхээсээ илүү жижиг төрлийн хамтын ажиллагааг хүртэл зөв зохицуулаад явна.Төрийн талд байгаа бизнесээс хувийн хэвшилд өгөх хууль. Гадаадын хөрөнгө оруулагчдын ч хууль эрхзүйн орчин бүрдэнэ.

Соёлын төвүүд гэлтгүй үр ашиггүй, зардал чирэгдэлтэй барилга байгууламжуудыг хувийн хэвшлийнхэн аваад явах боломжтой болно. Одоо барьж байгуулчихсан байгууламжуудыг хувийн хэвшлийнхэн ашиглах, лизинг хийх, менежментийг нь авч явах гээд олон хувилбарууд энэ хуулиар нээгдэж байгаа.