Баян-Өлгий аймгийн Засаг дарга Д.Бауыржан 2022 оны наймдугаар сарын нэгний өдөр Монгол Улсын Шинжлэх ухааны академийн дэд ерөнхийлөгч Г.Чулуунбаатар тэргүүтэй удирдлагууд, эрдэмтэн, судлаачдыг хүлээн авч уулзжээ.
Засаг дарга “Аймгийнхаа урт болон дунд хугацааны бодлогын баримт бичгүүд болон хөгжлийн чиглэлийг танилцуулаад, 100 жилийн түүхтэй ШУА-ийн баруун бүсийн салбар судлалын төвийг Баян-Өлгий аймагт байгуулах саналыг талархан хүлээн авч, шинжлэх ухаан технологи, иновацийн сургалт, судалгааны төв байгуулах ажилд дэмжлэг туслалцаа үзүүлж, хамтран ажиллахад бэлэн гэдгээ илэрхийлсэн байна.
Мөн ШУА-ийн Философийн хүрээлэнгийн Баян-Өлгий аймаг дахь салбарыг өөрийн гэсэн байртай очих хаягтай болгох асуудлыг ШУА-ийн Философийн хүрээлэнгийн захирал, доктор (Ph.D) Б.Пүрэвсүрэн тавьсныг Засаг дарга бүрэн шийдвэрлэх боломжтой гэдгийг онцолж, аймгийнхаа хөгжил дэвшлийн төлөө ЗДТГ-ын бүх шатны тооцоо судалгаанд суурилсан, шинжлэх ухааны үндэслэлтэй бодлого, шийдвэр гаргадаг байхад ШУА-ийн Философийн хүрээлэнгийн Баян-Өлгий аймаг дахь салбарын эрдэмтэн судлаачидаас онцгойлон анхаарч, хамтран ажиллаж байхыг хүсжээ.
Уулзалтын төгсгөлд ШУА, аймгийн Засаг Дарга Тамгын газрын хооронд хамтран ажиллах санамж бичиг үзэглэв.