"Монре" даатгалыг сонгож даатгуулчихаад нөхөн төлбөрөө авч чадалгүй сар, жил дамнасан иргэдийн бухимдал туйлдаа хүрч хөлөө хүрэх газраар заргалдаж яваа.
Өнгөрсөн зургадугаар сараас эхлэн манай сайтын редакцид Монре даатгалаас нөхөн төлбөрөө авч чадалгүй удаж байгаа тухай иргэн ярилцлага өгсөний дараа түүнтэй ижил шалтгаантай 20 гаруй даатгуулагчид холбогдож, аргаа барж байгаа тухай учирласан юм.
Энэ талаар "Монре" даатгалаас тодруулахаар удаа дараа очиход хуулийн зөвлөх нь гэж өөрийгөө танилцуулсан эмэгтэй "Удирдлагууд эзгүй байна. Тодруулга өгөх хүн алга" гэж мэлзсээр. Түүнчлэн "Танайх худлаа мэдээлэл гаргасан. Бид шүүхэд өгнө" гэж сүрдүүлэхээс өөрөөр нэг ч үггүй дээшээ, доошоо давхар хооронд зугтаан гүйх үйлдлээ давтан үзүүлсээр байв.
Харамсалтай нь "Монре" даатгал өөрсдийгөө буруугүй мэт булзааруулахыг оролдсон үйлдлийг нь Санхүүгийн зохицуулах хорооноос авсан тодруулга таслан зогсоосон юм.
Тодруулбал, СЗХ-ны Хяналт, шалгалт, зохицуулалтын газрын дарга Б.Долгорсүрэн "Тус даатгалтай холбоотой 100 орчим иргэд СЗХ-нд өргөдөл, гомдол гаргасны дагуу Үндэсний их баяр наадмын өмнө шалгалт хийж 2023.07.31-ний дотор иргэдийн нөхөн төлбөрийг барагдуулах үүрэг чиглэл өгсөн. Гэсэн ч тус даатгал хугацаандаа нөхөн төлбөрийг олгож чадаагүй тул нэг сараар сунгасан. Тиймээс 2023.08.31-ний өдөр хүртэл бүх иргэдийн нөхөн төлбөрийг олгохыг үүрэгдсэн. Хэрэв заасан хугацаанд олгож чадахгүй бол эрхийг түдгэлзүүлэх болон дараа дараагийн арга хэмжээ авч ажиллана" гэв.
Олон нийтэд нээлттэй байдаг мэдээллийн сангаас "Монре" даатгалын эзэмшигчийг хайвал УИХ-ын гишүүн Т.Дорхжхандын эхнэр, Уламбаяр сайдын охин У.Сийлэнгийнх гэдэг нь тодорхой харагддаг. Тэр ч бүү хэл Т.Доржханд гишүүн хувь эзэмшиж, хөрөнгө оруулалтын мэдүүлэгтээ нээлттэй мэдээлж байсан.
Би л даатгалын компанитай хүн шүү гэсэн шиг Даатгалын тухай хуулийн хэлэлцүүлэгт "намба алдаж" хөгөө чирч явсан.
Ямартай ч эрээ цээргүй хамгаалчих Их хурлын гишүүн артай болохоор яаж ч дураараа авирлаж болдог гэж ойлгосон уу эсвэл яах аргагүй санхүүгийн хүндрэлд орчихоод энэ олон хүнийг эд хөрөнгө, эдийн засаг, цаг хугацаагаар нь хохироогоод байна уу.
Нэгэн эдийн засагчаас даатгалын компани дампуурах гол шалтгаануудыг тодруулахад "Олон шалтгаан нөхцөл бий. Ерөнхийдөө тухайн даатгалын олж буй ашгаас нь нөхөн төлбөр давсан тохиолдолд олгож чадахгүй байх, хаалгаа барих эрсдэл үүсдэг" хэмээн тайлбарласан юм.
"Монре" даатгал иргэдийн хохирлыг барагдуулахад 16 хоног үлдсэн. Хэрэв энэ хугацаанд нөхөн төлбөрийг гаргаж өгөхгүй бол үйл ажиллагаа нь зогсох эрсдэл хүлээж байгаа.
Одоогийн байдлаар манай сайтын редакцид гомдол гаргасан 20 гаруй иргэдийн хоёр нь нөхөн төлбөрөө авсан бөгөөд үлдсэн нь хэл ам, хэрүүл тэмцэл хийж хүлээсээр байгаа.
Эцсийн эцэст Монре даатгалын үйл ажиллагаа хэвийн явагдах эсэхийг Т.Доржханд гишүүн биш итгэж даатгах иргэд шийддэг.