Монгол Улс түүхэндээ анх удаа 2016 онд бие даасан Хүүхэд хамгааллын тухай хуультай болсон байдаг.  Тэгвэл 2021 оны 03 дугаар сарын 08-ны ОУ-ын эмэгтэйчүүдийн эрхийг хамгаалах өдрийг тохиолдуулан Хүүхэд хамгааллын тухай хуулийн нэмэлт өөрчлөлтийг УИХ дахь эмэгтэй гишүүд хамтран өргөн барьсан юм.

Ингэхдээ одоо хэрэгжиж буй Хүүхэд хамгааллын тухай хуулийн хэрэгжилтэд хийсэн хөндлөнгийн үнэлгээний тайлан, хүүхэд хамгааллын чиглэлээр үйл ажиллагаа явуулдаг Төрийн болон ТББ, НҮБ-ын Хүүхдийн Сангийн мэргэжилтнүүдийн саналд үндэслэн Хүүхэд хамгааллын тухай хуулийн нэмэлт өөрчлөлт оруулах тухай хуулийн төслийг боловсруулжээ.

Тус саналд, 2016 оны 12 сард Гэр бүлийн хүчирхийлэлтэй тэмцэх тухай хуулийг батлахдаа “Хүүхэд хамгааллын тухай хуулиас хамтарсан багийн зохион байгуулалт, чиг үүрэгтэй холбоотой заалтуудыг хассан. Ингэснээр хүүхэд хамгааллын хариу арга хэмжээтэй холбоотой манлайлал, удирдлага зохион байгуулалтын дэмжлэгийг бууруулж, хүүхэд хамгаалал дахь нийгмийн ажлын үйлчилгээнд зориулах санхүүгийн хуваарилалт, хариуцлагыг дутуу үнэлэн, улмаар хамтарсан баг нь хүүхэд хамгааллын чиглэлээр ажиллахгүй, зөвхөн гэр бүлийн хүчирхийллийн дуудлага, тохиолдолд илүү их анхаарах ёстой гэсэн хандлагыг бий болгох зэргээр Хүүхэд хамгааллын тухай хуулийн хэрэгжилтийг сулруулсан дүр зураг харагдаж байна” гэж дүгнэжээ.

Мөн цахим орчинд хүүхдийн эсрэг хүчирхийллийн талаарх мэдээлэх, хяналт тавих талаар эрх зүйн зохицуулалтыг сайжруулах шаардлагатай байгааг судалгааны дүнгүүд харуулж байгаа талаар УИХ-ын гишүүн С.Одонтуяа онцоллоо.

Иймээс тэд Хүүхэд хамгааллын тухай хуульд нэмэлт, өөрчлөлт оруулах тухай хуулийн төсөлд дараах асуудлыг тусгажээ. Үүнд;

-Монгол Улсын Үндсэн хууль, Хүүхдийн эрхийн тухай конвенцийн үзэл санаа, зарчимд нийцүүлэн хуулийн 2 болон 3 дугаар зүйлд зарчим, хамрах хүрээг нэмэгдүүлэх;

-Хүүхдийн хамгаалагдах эрхийн хүрээнд хуулийн 4 дүгээр зүйлд хүүхэд хамгааллын кейс үйлчилгээний талаарх нэр томъёог олон улсын жишигт нийцүүлэн шинээр тусгах

-Хууль зүйн салбар дахь хүүхэд хамгаалал, Шүүн таслах ажиллагааны бүхий л явцад хүүхэд хамгаалах бодлого, хүүхдийн эрхийн зарчмыг баримтална,

-Хүүхэд, гэр бүлтэй холбоотой маргааныг хүүхэд, гэр бүлийн талаар мэргэшсэн шүүгч шүүнэ гэж оруулах.

-Мөн Мөрдөн шалгах үйл ажиллагаан дахь хүүхэд хамгаалалын асуудлыг тусгахдаа Хүүхдийн эцэг, эх асран хамгаалагч, харгалзан дэмжигч, хууль ёсны төлөөлөгчтэй байнгын холбоотой байлгах боломжоор хангана.

Хүүхэд хамгааллын тухай хуулийн 18 дугаар зүйлд орон нутгийн түвшинд /сум, хороонд/ хүүхэд хамгааллын үйлчилгээг хүргэх, орон тооны нийгмийн ажилтан ажиллуулах, тэднийг бодлого, зохицуулалт, удирдлага арга зүйгээр хангах,

Хуулийн 23 дугаар зүйлд хүүхэд хамгааллын үйлчилгээний төсвийн хуваарилалт, зарцуулалт, жишиг зардлыг тооцох, аргачлал, журмын талаар нэмэлт, өөрчлөлт оруулах зэрэг болно.

Хуулийн төсөл батлагдсанаар хүүхэд хамгааллын тогтолцоо бэхжиж, төрийн байгууллагын бүтэц, тогтолцоо, чиг үүрэг бүх түвшинд тодорхойлогдож, хүүхэд хамгааллын үйлчилгээ мэргэжлийн түвшинд, шаардлагатай хүүхэд бүрт хүртээмжтэй хүрэх болно гэж УИХ-ын 13 эмэгтэй гишүүн үзэж байгаа аж. Нөгөөтэйгүүүр хүүхэд хамгааллын үйлчилгээ төрөлжиж, нэр төрөл нь олширч, чанар, хүртээмж дээшилнэ гэж үзжээ.