Монголын жүжигчид АНУ-ын театрт анх удаа бүрэн хэмжээний жүжгийг англи хэлээр тоглохоор болжээ. Энэ талаар өнөөдөр /2022.05.17/ жүжигчин Р.Анхням, GUYS хамтлагийн дуучин, хөгжмийн зохиолч А.Төгсбаяр  тэргүүтэй уран бүтээлчид мэдээлэл хийлээ.

73 цаг жүжиг

2004 онд бичигдэж, 18 жилийн  дараа тайзнаа тавигдаж байгаа “73 цаг” жүжгийн   гол процесс 73 цагийн дотор өрнөдгөөрөө онцлог аж. Амьдралд хайр байхгүй бол хөг аялгуу үгүй. Тэр утгаараа хайрын тухай жүжгийг тэд ийн амьлуулжээ.

Сонирхолтой нь, тус жүжгийг англи, монгол хэл дээр тайзнаа тоглож, АНУ, Азийн улс орнуудад толилуулах нь ээ.  Мөн дэлхийд театрын урлагийг таниулах маш том боломж гэж уран бүтээлчдийн баг тодотгосон юм. Гадны хэл дээр тоглогддог жүжиг хуруу дарам цөөн. Тэгвэл “73 цаг” драмын жүжиг олон улсын хэл дээр  ийнхүү тун удахгүй АНУ-ын тайзнаа тавигдах нь. Цаашид жүжгээ англи, орос, монгол гурван хэлээр үзэгчдийн хүртээл болгох сонирхолтой байгаагаа ч тус жүжгийн уран бүтээлчид онцолсон юм.

Ямартаа ч сүүлийн үед жүжгийн тайзнаа төдийлөн гараагүй уран бүтээлчдийг “73 цаг” жүжгийн тайзнаа ийнхүү харах нь. Энэ үеэр жүжигчин Р.Анхням "Хүний амьдралд тохиолдож буй эргэлтүүд ганцхан хормоос шалтгаалдаг. Тэр нь цаашаа үргэлжилдэг байх. Манай жүжиг хүний амьдралд 73 цагийн дотор ямар эргэлтүүд хийж болох вэ гэдгийг харуулдаг. Театр бол амьдрал дээр байхгүй зүйлийг ч бий болгож, түүндээ хүмүүсийг итгүүлдэг.  1.50 минут иргэдтэйгээ тасралтгүй амьдаар харьцаж, нөхцөл байдлыг итгэж үнэмшүүлээд гаргах нь театрын гайхамшиг.  Монгол гэлтгүй гадаад иргэдийн санаанд буухгүй зүйлүүд манай жүжигт их бий" хэмээв