Хууль зүй, дотоод хэргийн сайд Б.Энхбаяр эрхлэх асуудлынхаа хүрээнд Шүүхийн шийдвэр гүйцэтгэх Ерөнхий газрын дарга, Бригадын генерал Б.Нандинболорыг үүрэгт ажлаас нь чөлөөлж, генерал А.Намсамандыг гүйцэтгэгчээр томилоод багагүй хугацаа өнгөрч байна. Одоогоор Б.Нандинболор генералыг ямар шалтгаанаар ажлаас нь чөлөөлсөн нь тодорхойгүй байгаа юм. Ямартай ч Б.Нандинболорыг 2024 оны дөрөвдүгээр сарын 3-ны Засгийн газрын хуралдаанаар ШШГЕГ-ын даргаар томилсон байдаг бөгөөд ажлаас чөлөөлөгдөх болсон шалтгаан нь Л.Оюун-Эрдэнийн хүн гэх шалтаг хэмээж байна.

Харин түүний оронд үүрэг гүйцэтгэгчээр томилогдсон  хурандаа А.Намсаманд тун удахгүй өндөр настны амралтандаа суух гэж байгаа юм байна. Тодруулбал ШШЕГ-ын дарга асан Бригадын генерал Б.Нандинболорын Б/1742 тоот тушаалаар Адъяабазарын Намсамандад тэтгэмж олгосон талаар Улстөрч.мн сайтад мэдээлжээ. Уг тушаалд “...цэргийн алба хаагчийн нэг удаагийн тэтгэмжийн 18 сард оногдох хэсгийг есдүгээр сарын 22-ны өдрөөр тооцож, 69 сая төгрөг олгосугай” хэмээжээ.

А.Намсаманд нь 2025 оны есдүгээр сарын 22-ны өдөр хүртэл цэргийн албанд биеэр 26 жил 9 сар 23 хоног, Шүүхийн шийдвэр гүйцэтгэх байгууллагад ажилласан хугацааны 4 жил 8 сар, нийт 31 жил 5 сар 23 хоног ажилласнаар тооцуулсан байна. Товчхондоо түүний ажил жилийг дүйцүүлэн нийт 69 сая 477 мянга 307 төгрөг бодогдсон гэсэн үг.

Гэхдээ тэтгэврт гарах гэж буй хурандааг яг ямар учраас түр гүйцэтгэгчээр тавьснаа Б.Энхбаяр сайд тодруулж, тайлбарлах үүрэгтэй. Уг нь Б.Нандинболорыг хоригдлууд нөхцөл байдлыг сайжруулсан, хүний эрхийн мэдрэмжтэй дарга хэмээн ам сайтай байдаг юм билээ.