МОНГОЛЫН ТӨР СОНС. Тэсэж зүтгэж , итгэж хүлээлээ...

Ковид цар тахлын тамлалтыг даваад оргил үедээ 70 сая тонн нүүрс тээвэрлэсэн тээвэрчин залуусын хувьд зорилго нийтлэг. Эх орондоо зүтгье, сайн хөдөлмөрлөж хичээе. Тэр хэрээрээ цалин орлоготой болж гэр бүл үр хүүхдээ сайн сайхан явуульяа гэдэг л энгийн зүйл байсан. Сүүлийн 3 жил бол “өрөө л дарчихьяа” гэдэг бүүр ядарсан зорилгын дор зүтгэж байна.

Та нар яагаад “гоншигоноод” байдаг юм бэ, өчнөөн нүүрс зөөгөө л, мөнгө аваал байгаа биз дээ гэж энэ салбараас мөнгөний тулам нь язартлаа баяжсан дарга нар, нөгөө талд цаад учрыг нь олдоггүй жирийн иргэд, улс төрчид асууж байна.

Хариульяа.

• Ерөнхий сайдын хэлснээр хөдөлмөрлөөд байхад ядуураад байгаа учраас уур хилэн нь бадарч байна.
• Ажил хийж ачаа нүүрс зөөе гэхээр хятадын хөрөнгө, авилгын сүлжээгээр НОГООН ГЭРЭЛ-ээр орсон машинууд, улс төрчдийн хуйвалдаанаар боссон том компаниуд дээрэмдээд байна. Олдсон жоохон нүүрс ачааг улны ханшаар зөөж байгаа ч банк зээлийнхээ хүүгч төлж чадахгүй тартагтаа тулсан учраас бухимдаж байна
• Нүдэн дээр шүү, арга зальтай, том нөлөөтэй компани, хятад өвөрмонголчууд нь баяжаад эргээд тээвэрчдийг эх оронд нь боолын тээвэр хийлгээд хөдөлмөрийг нь мөлжөөд байгаад нь уур хилэн нь бадраад байна. Энд хүний эрх яривал “бөмбөрцгийн тэнэг” гэж харагддаг болсон тул гутарч байна.
• Төрийн уурхай ЭТТ ХК нь оффтейк гэрээний худалдан авагчийн доодохыг долоодог түвшинд хүрч, хамгийн бага үнээр алалдуулах схемээр биржийн нүүрсээ хил давуулж, нүүрс худалдаанаас алдсан шархаа тээврээс нөхөх аргаар хөдөлмөрийн мөлжлөг хийгээд байгаад бухимдаж байна. Энэ тээврийн цавчаа ашгаа “Биржийн арилжааны ашиг” гэж бүх монголчуудыг, ерөнхий сайдтай нь хуурч тархийг нь угааж байгаад бүүрч эгдүүцэж байна. Тээврээс, тээвэрчдээс дээрэмдэж олсон “төрийн” гэх ашгийг нь улс төрчид хувааж идэж зусалж гударч найрлаж дуусгаж байгаад уур хилэн нь бадарч байна. 140 тонн нүүрс ачаад өдөр шөнөгүй тээвэр хийгээд ч УБ т халтуур хийдэг найзаасаа бага орлоготой, өрөнд унаад байгаадаа ичиж гутарсан 15 мянган тээвэрчдийн арми үүнд хилэгнэж байна.
• Улсын хил дээр улс төрийн хамгаалалттай хувийн компани төлбөртэй гарц эзэмшиж , давуу эрх эдэлж сарынх нь нэг рейсийг байнга хулгайлж байгаад зэвүүцэж байна.
• ЭТТ ХК- ийн БЭТ нь сайн ажилласан гэж 400 сая төгрөгөөр шагнуулж байхад тэр ашгийг нь хийж өгсөн 440 компани, 2500 иргэн тэдгээрийн тээвэрчдийн амьдрал нь уланд орж нэг их наядын өрөө төлж дийлэхгүй болсонд гутарч байна.
• Нүүрс шигээ халтар царайтай ч хөлс хүчээ шавхаж буй тээвэрчин залуусаа төр засаг нүд үзүүрлэж, төрийн сайдууд нь худал амлалтаар хууран мэхэлж байгаад эгдүүцэж байна.
• Шударга ёсыг тогтоож эрх тэгш болгоно гэсэн шинэ засаг их хүлээлт итгэлийг нь хөсөрдүүлж монопол нүүрсчдийн өмнө хүчгүйдэж, хоёр нүүр гаргаж байгаа тул итгэл найдвараа алдаж байна. Энэ бол зөвхөн тээвэрчдийн бус хууртагдсан монголын бүх иргэдийн цөхрөл .

Одоо яах вэ гэж залуус асууж байна. Зулын гол болъё гэнэ . ҮГҮЙ!!! Тэртээ тэргүй сөхөртлөө тэсэж зүтгэвч ядуурсаар, гэр бүл орчин тойрондоо “бүтэлгүй” нэр зүүж гэртээ харих нүүргүй болж, нэр төрөөрөө шатдагаа шатсан. Монопол дээрэнгүй болсон худалдан авагч, тэд нарт худалдагдсан улстөрчид, зарц нь болсон дарга нарын давралыг хязгаарлах цаг ирсэн. Энийг шударга ёс амлаад байгаа Ерөнхий сайд оройлж хийнэ. Эс бол дарлагдсан бид шоронд орж сошиалын шонд дүүжлүүсэн ч үл ухрах чин зориг, эв нэгдлээрээ дуусгаж дарлалд ЦЭГ тавина. Бид улс төргүй, мөнгөгүй тул хонгилын шорон ойрхон байгаа, гэхдээ эрх тэгш шударга ёсны ялалт хамт ирнэ.

ЗАЛХЛАА, ЦӨХӨРЛӨӨ ” уриан дор тээвэрчид тэмцлийн хурц хэлбэрт шилжиж өлсгөлөн зарлах шийдвэр гарсаныг үүгээр мэдэгдэж байна.  Нэгдэх нь 1 дараад ороод ир.

БООМТЫН БООЛЧЛОГДСОН ТЭЭВЭРЧДИЙН ЭВ НЭГДЭЛ- БАЯНЗАМ ТЭЭВЭРЧДИЙН ХОЛБОО

2025.12.01