Засгийн газар өнөөдөр хуралдаж, мэдээлэл хийлээ. Улс төрийн нэрт зүтгэлтэн С.Зоригийн хэргийн асуудлаар олон улсын байгууллага, хүний эрхийн байгууллагуудтай хамтран ажиллах ажлын хэсгийн ахлагч ХЗДХ-ийн дэд сайд Б.Солонгоо:
“С.Зоригийг хөнөөсөн хэрэгт хилсээр яллагдсан Т.Чимгээ, Б.Содномдаржаа нарын эрх ашгийг хамгаалах асуудлаар Олон улсын хүний эрхийн байгууллагуудтай хамтран ажиллах, санал боловсруулж дүгнэлт гаргах” үүрэг бүхий Засгийг газрын ажлын хэсгийг байгуулсан. НҮБ-ын Хүний эрхийн хороо, Эрүү шүүлтээс урьдчилан сэргийлэхээр ажилладаг дэд хороотой ажлууд хамтран хийхээр төлөвлөж байгаа. Ажлын хэсэг юун түрүүнд холбогдох асуудлыг судалж, Т.Чимгээ, Б.Содномдаржаа нартай биечилсэн уулзалтууд хийнэ. Цаашдаа олон улсын экспертүүд болон хөндлөнгийн зөвлөхүүдтэй хамтарч ажиллах олон улсын хэмжээнд энэ асуудлыг гаргах, цаашдаа Монгол Улсын иргэдийн эрх зөрчигдөхгүй байх дээр анхаарах, шаардлагатай арга хэмжээг авна. Эрх нь зөрчигдсөн Монгол Улсын иргэн Т.Чимгээ болон Б.Содномдаржаа нарын эрхийг сэргээх, хохирлыг барагдуулах, нөхөн төлбөр олгоход дэмжлэг үзүүлэх асуудал дээр ажлын хэсэг байгуулагдсан. Хэрэг хянан шийдвэрлэх, мөрдөн байцаах ажиллагаа холбогдох хуулийн дагуу харъяалах чиг үүргийн байгууллага дээр үргэлжилж байна. Бидэнд байгаа мэдээллээр Т.Чимгээ, Б.Содномдаржаа нарыг яллагдагчаар татсан прокурорын тогтоолыг хүчингүй болгож шийдвэрлэсэн. Сэжигтэн гэж үзэхгүй байгаа. Монгол Улсын иргэдийн зөрчигдсөн эрхийг сэргээх нь Засгийн газрын үүрэг. Хуульд заасан нөхөн төлбөрийг олгохоор ажиллаж байна” гэжээ.