Увс аймгийн Улаангом хотод наймдугаар сарын зургааны өдөр МУ-ын Ерөнхийлөгчийн ивээл дор зохион байгуулагдсан 21 аймгийн аварга шалгаруулах “Үндэсний цом” хөлбөмбөгийн тэмцээний Нэгдүгээр шатны аваргын төлөө Баян-Өлгий аймаг болон Төв аймгийн шигшээ багийн хооронд гал гарсан тоглолт болж, Баян-Өлгий аймгийн шигшээ багийн ялалтаар өндөрлөсөн юм.
Ингэснээр ерөнхий боловсролын гуравдугаар сургуулийн биеийн тамирын багш, Азийн Хөлбөмбөгийн Холбооны “С” зэрэглэлтэй, футзалын Монголын Хөлбөмбөгийн Холбооны “Level-1” зэрэглэлтэй М.Мейрамбек дасгалжуулагчтай аймгийн шигшээ баг Нэгдүгээр шатны цомын эзэн, аварга багаар шалгарав.
Аймгийн шигшээ багийн хөлбөмбөгчид нэгдүгээр шатны аварга болж, цом хүртсэнээс гадна багын хагас хамгаалагч Мустафа “Шилдэг найруулан тоглогч”, шигшээ багын хаалгач Көпберген” Шилдэг хаалгач”-аар тус тус шалгарсан юм.
Аймгийн Засаг дарга Д.Бауыржан Увс аймагт өргөн бүрэлдэхүүнтэй очиж, аймгийнхаа баг тамирчдыг урамшуулан, хөгжөөн дэмжсэн юм. Аймгийнхаа баг тамирчдыг Засаг дарга өөрийн биеэр очин хөгжөөн дэмжсэн явдалд М.Мейрамбек дасгалжуулагчтай шигшээ багийн тамирчид баярласан талархсанаа илэрхийлжээ.
Мөн Засаг даргын орлогч Х.Арман, ЗДТГ-ын дарга Б.Мухамед, Биеийн тамир спорт газрын дарга Х.Хайнар, Аймгийн ИТХ төлөөлөгч Ш.Алгабек, Өлгий сумын Засаг даргын орлогч Х.Нурболат, Өлгий сумын ИТХ төлөөлөгч О.Ертай, Аймгийн МХГ-ын дэд дарга Б.Досжан, зурагчин Р.Хуанган, жолооч Х.Ерболат, жолооч М.Хумарбек нар шигшээ багаа хөгжөөн дэмжжээ.