Нийслэлийн Эрүүл мэндийн газар /НЭМГ/-ын дарга Б.Бямбадорж нийслэлийн Удирдах ажилтнуудын шуурхай зөвлөгөөнд Коронавирус болон томуу, томуу төст өвчний нөхцөл байдлын талаар мэдээлэл өглөө. 

Тэрбээр “Коронавирусийн халдварын тархалт нэмэгдэх хандлагатай байна. Өнгөрсөн долоо хоногоос 15 хувиар нэмэгдсэн. Вирусийн хувилбарын шинжилгээ хийхэд омикроны BA.4, BA.5 хувилбар бүртгэгдсэн.

Ханиах, халуурах, хоолой өвдөх гэх мэт ерөнхий шинж тэмдэг илэрч байгаа.

Долдугаар сарын 18-нд 290 тохиолдол бүртгэгдлээ. Томуу, томуу төст өвчний халдвар мөн буурахгүй байна. Тухайлбал, амбулаторийн үзлэгийн 9.1 хувийг томуу, томуу төст өвчин эзэлж байна. Хичээл эхлэх үеэр халдварын тархалт нэмэгдэх хандлагатай байна” гэдгийг онцоллоо.

Мөн нөхцөл байдалтай холбогдуулан олон нийтийн газар амны хаалт тогтмол зүүх, халдвар хамгааллын дэглэм баримтлах шаардлагатай байгааг санууллаа.

Түүнчлэн иргэдийг нэмэлт дөрөвдүгээр тунд хамрагдах шаардлагатай ч мэргэжлийн байгууллагынхан зөвлөж байна.

Гуравдугаар тунд нийслэлийн зорилтот иргэдийн 54 хувь нь хамрагдсан бол дөрөвдүгээр тунд таван хувь нь хамрагджээ. Вакцины нөөц хангалттай байгаа бөгөөд нийслэлийн хэмжээнд дархлаажуулалтын 33 цэг ажиллаж байгаа гэх мэдээллийг албаныхан өглөө.

Үүнээс гадна сүүлийн 24 цагийн хугацаанд 181 хүн коронавирусний халдвар авсан нь батлагджээ.

Энэ нь улсын хэмжээнд өнгөрсөн 24 цагийн хугацаанд хийсэн PCR шинжилгээгээр батлагдсан тохиолдлын тоо юм. Хоногт батлагдсан халдварын тохиолдлуудын 143 нь Улаанбаатар хотод, 38 нь орон нутагт бүртгэгдсэн байна.

Монгол Улсын хэмжээнд ковидын халдвараар нийт 932058 хүн өвчилжээ.

Өнгөрсөн 24 цагийн хугацаанд бүртгэгдсэн 181 тохиолдлын тоо нь сүүлийн сар гаруйн хугацаанд хоногт илэрсэн хамгийн өндөр тохиолдол боллоо.

Ковидын тохиолдол орон нутагт Баян-Өлгий аймагт хоёр, Дархан-Уул аймагт долоо, Дорноговь аймагт нэг, Орхон аймагт нэг, Өмнөговь аймагт 25, Ховдод гурав бүртгэгджээ.

Улсын онцгой комиссоос Монголд коронавируст халдварын “Омикрон” хувилбарын BA.1, BA.2 хувилбар давамгайлж байгааг анхааруулсан. Өнгөрсөн зургаадугаар сарын сүүл үеэс манай улсад BA.4, BA.5 хувилбар бүртгэгдэж, хүн амын 10 орчим хувьд тархжээ.