Нийслэлд болохгүй асуудал олон бий, Үүнийг цэгцлэнэ гэдэг амаргүй. Улс төрийн талаас бол бүр ч хэцүү. Гэхдээ өдгөөгийн Хотын дарга Х.Нямбаатар энэ бүхэн дээр зориг зүрх гарган ажиллаж байгаад нийслэлчүүд талархалтай байна. Ямартай ч хуучин автомашины импортод цэг хатгаж чадлаа. Хуучин автомашинаас үүдсэн осол аваар, утаа гээд юу эс мундах билээ. Үүнээс үүдэн, Хотын дарга автомашины ченжүүдэд адлуулж байгаа ч аргагүй том шинэчлэл хийчихлээ. Манайхан “Комиссын машин” хэмээн нэрлэдэг дээ.

Олон жилийн насжилттай автомашин оруулж ирснээс нийслэлийн болон, орон нутгийн замд осол гарч хүмүүс бэртэж гэмтэж, амь насаа алдах тохиолдол гардаг. Үүнийг цэгцэлнэ гэдэг маш буянтай ажил. Ийнхүү хуучин автомашинаас үүдэн, эрдэнэт хүний амь үрэгдэж байхад зөвхөн эрх ашгийн төлөө эсэргүүцэл илэрхийлж байгаа нь буруу юм. Нөгөө талаар ингэж автомашины импортыг хязгаарлах шийдвэрийг гаргахгүй бол Улаанбаатар хотын түгжрэлийг шийдэх боломжгүй. Энэ онд гэхэд Монгол Улсад 87 мянган тээврийн хэрэгсэл импортоор орж ирсэн статистик бий.

Гаалийн ерөнхий газраас гаргасан мэдээгээр энэ оны эхний зургаан сарын байдлаар 52392 ширхэг суудлын автомашин импортлогдсон нь өнгөрсөн оны мөн үетэй харьцуулахад 93.3 хувиар, 12484 ширхэг ачааны автомашин импортоор орж ирсэн нь өмнөх оны мөн үетэй харьцуулахад 44.3 хувиар өссөн үзүүлэлт юм байна. Гэхдээ эдгээр автомашинуудын 90 орчим хувь нь 6-10 жилийн насжилттай байгаа нь хязгаарлахаас өөр аргагүй юм.

Монгол Улсын хэмжээнд өнөөдрийн байдлаар 1,280,199 тээврийн хэрэгсэл бүртгэлтэй байгаагаас нийслэлд 756,037 тээврийн хэрэгсэл нь бүртгэлтэй юм байна. Нийслэлийн зүгээс түгжрэлийг сааруулах зорилгоор Улаанбаатар хотод олгох тээврийн хэрэгслийн улсын бүртгэлийн дугаарын дээд хязгаарыг тогтоох тухай асуудлыг энэ оны эхээр Нийслэлийн иргэдийн төлөөлөгчдийн хуралдаанаар хэлэлцүүлэн, шийдвэр гаргуулсан нь нүдээ олсон зүйл юм.

Үндэсний статистикийн хорооны 2012-2021 оны тоон мэдээлэлд үндэслэн тооцоход 2025 он гэхэд Улаанбаатар хотод 840 орчим мянга, 2030 онд 1.1 сая, 2035 онд 1.5 сая, 2040 онд хоёр сая гаруй тээврийн хэрэгсэл бүртгэгдэх тооцоолол гарсан. Гагцхүү энэ бүхэн хуучин тээврийн хэрэгсэл гэж үзэхээр өнөөх л осол аваарын гол үндэс болно. Мөнхүү Улаанбаатар хотын авто замын сүлжээний урт 1213 километр байдаг. Автомашины импорт энэ байдлаараа үргэлжилбэл 2040 он гэхэд Улаанбаатар хотын авто замын хурд 0 километр цаг буюу бүтэн өдрийн турш түгжрэлтэй байх төлөв гаргасан байдаг.

Авто замын түгжрэл хамгийн их үүсдэг их тойруугийн бүсэд өдөрт 198-233 мянган тээврийн хэрэгсэл хөдөлгөөнд оролцдог. Энэ төвлөрлийн бүсийн авто замын урт нь 62 километр байдаг. Энэ уртад тээврийн хэрэгслийн хурд, жолоочийн самбаачлах хугацаа, бүрэн зогсолтын урт, тээврийн хэрэгслийн урт зэргийг тооцоод автомашин 25 километр цагийн хурдтай явахад 85,783 тээврийн хэрэгсэл хөдөлгөөнд оролцох боломжтой. Харин 157 мянга тээврийн хэрэгсэл хөдөлгөөнд оролцоно гэж тооцвол автомашин 9-24 километр цагийн хурдтай л явах боломж байгааг албаныхан мэдэгдэж байв. Хотын дарга энэ мэт шийдвэрийг зоригтой гаргаж байгаад талархах хэрэгтэй.