Жил өнжсөн “тойргийн гишүүний мэдлийн мөнгө”-ийг ирэх оны улсын төсөвт дахин суулгахаар болсон тухай нэр бүхий гишүүд шүгэл үлээв. Улсын эдийн засаг хүндэрч,  нүүрсний үнэ унаж, “Алт” хөтөлбөрөөс өөр найдах юмгүй энэ цаг үед шүү дээ. Хэмнэе, таная гээд байсан гишүүдэд Засгийн газар, төсвөөс авах 15 тэрбум төгрөгөөрөө ямар хөрөнгө оруулалт, бүтээн байгуулалт хийх тухай саналаа өгөхийг хүсчээ. Өнөөдүүлийн олонх нь Засгийн газарт хүсэлтээ “дайсан” сураг байна, цаана чинь.

Бүсчилсэн хөгжил, томсгосон тойрог энэ тэр алсарч, тойргоо усалдаг тогтолцоондоо буцаад орох нь. Бөөн бужигнаан болж байж бүсчилсэн хөгжлийнхөө конвенцийг баталсан юмсан. Атал одоо хэмнэлт гэх нэрээр төсвийг задалж, тойрогтоо санхүүжилт авахаар улайрч байна. Тойргоос сонгогдсон ч том төслүүдийг дэмжих “ТАНГАРАГ”-аасаа няцах байсан юм бол УИХ яах гэж 126 гишүүнтэй болсон юм бэ. 76 гишүүнийг 126 болгож олшруулахаар шаардлага бидэнд байсан уу гэхчлэн олон асуултыг ар араасаа дагуулж байна.

Жилд 15 тэрбумыг авахаар улайрсан төрийн түшээд сургууль, цэцэрлэг төдийхөн барих хсүэлт ирүүлсэн тухай Сангийн яамныхан өгүүлж байна. Тэр дунд нь нэг хэсэг шуугиан тарьсан боловсролын шинэчлэлийг дэмжихэд зарцуулах хүсэлт зоригтой санал ирэв үү гэтэл үгүй гэв. Байшин барих нь 2 жилийн туршлага ноу хаугаас илүү үнэ цэнтэй гэж үзэгсдийг бид сонгосон бололтой. Тэд дахин дахин сонгогдох боломжийг эрэлхийлснээс биш, дараа дараагийн үедээ гарц, шийдэл болохыг асуудлыг онцолсонгүй. Шуудхан хэлэхэд  УИХ-д зориулж урласан дархлааг унагах уран мэхийг УИХ-ын гишүүд өөрсдөө хийх нь тодорхой болчихлоо.

З.Урсгал