Монгол Улсын иргэн бүрд газар эзэмших эрхийг Үндсэн хуулиар олгосон. Нөгөө талаар худалдан авах, бусдад худалдах эрх нь нээлттэй байдаг. Гэтэл Үндсэн хуулиас дээгүүр толгойтой Баянзүрх дүүргийн ИТХ-ын дарга Ч.Мэндсайхан, Байгаль орчны газрын байцаагч н.Цогтбаатар, дүүргийн ИТХ-ын төлөөлөгч Б.Нямдорж, хорооны Засаг дарга С.Мөнхсутай нар энэ эрхийг зөрчиж, иргэдийг дарамтлан хохироож байна. 

Тодотговол, иргэн М нийслэлийн Газрын албанаас зарласан дуудлага худалдаанд оролцож, Гачууртад газар худалдан авчээ. Ийнхүү дуудлага худалдаагаар авсан газар дээрээ хашаа барих гэхээр тус хорооны Засаг дарга С.Мөнхсутай, Баянзүрх дүүргийн Байгаль орчны газрын байцаагч н.Цогтбаатар, дүүргийн ИТХ-ын төлөөлөгч Б.Нямдорж нар иргэдийг турхиран хашаа бариулахгүй байгааг бидэнд мэдээлсэн юм. Тэд ингэхдээ Монголын чөлөөт бөхийн холбооны залуусыг дагуулан очиж, хашаа барих гэсэн иргэнийг хэл амаар доромжилон хөөж явуулсан байх юм.

Тухайн иргэн хөрөнгө мөнгөө гарган, хууль ёсны дуудлага худалдаанд оролцож, нэгэнт өөрийн болгочихсон газар дээр хашаа бариулахгүй байгааг юу гэж ойлгох вэ. Үүний цаана асар том эрх ашиг байгааг нуух юун. Нийслэлд газрын асуудал бол авлига, арилжаа наймааны нэгээхэн том талбар болчихсон. Тиймээс дээр дурдсан эрхмүүд нийслэлээс зарласан дуудлага худалдаанд орж өмчлөөд авчихсан газар дээр хашаа бариулахгүй байгаа нь иргэнээс авлига авах гэсэн нэг арга байх. Эсвэл элдвээр шалтаглаж байгаад тухайн иргэнээс газрыг нь булаан авч цааш дамлан зарах гэсэн байхыг үгүйсгэхгүй.

Үүний цаана, гол эзэн нь дүүргийн ИТХ-ын дарга Ч.Мэндсайххан байгаа нь ойлгомжтой. Учир нь тэрбээр цахим орчинд лайв хийхдээ “Газар авсан иргэд болон нутгийн иргэдийн хооронд маргаан гараад байна” хэмээн огт маргаан гараагүй зүйлийг хэргээр олон нийтэд худал мэдээлсэн. Мөн үеэр дүүргийн ИТХ-ын төлөөлөгч Б.Нямдорж “Би ажлаа хийж байна. Та нарыг эндээс зайлуулах эрх нь надад байна” хэмээн эрх мэдэл, албан тушаалаа урвуулан ашиглаж, иргэдийг дарамтлан танхайрчээ.

Тиймээс Баянзүрх дүүргийн Засаг дарга Г.Жаргалсайхан өөрөө энэхүү дээрмийн бүлэглэлд байдаггүй бол Баянзүрх дүүрэгт цэцэглэж буй газрын наймаа, авлигын асуудалд анхаарал хандуулан, улмаар дээрх алба хаагч нарт хариуцлага тооцох, төрийн албанаас чөлөөлөх хүртэл арга хэмжээ авахгүй бол цаашид нөхцөл байдал улам л хүндрэх төлөвтэй. Мөнхүү шударга ёс хэмээн тодорсон Хотын дарга Х.Нямбаатар, дүүргийн иргэдийн итгэлийг авч, УИХ-д сонгогдсон Э.Бат-Амгалан тэргүүтэй эрхэм гишүүд ч энэхүү асуудалд анхаарал хандуулах зайлшгүй шаардлага үүссэн. Шуудхан хэлэхэд хурган дарга нарын энэхүү дээрмийн асуудлыг зогсоохыг шаардаж байна.

Нэгэн цагт нийслэлийн газрын наймааны “Загалмайлсан эцэг” гэгдэж явсан М.Энхболд төрөөс явсан цагаас хойш газрын наймааны асуудалд цэг хатгасан, одоо ч тэмцэж байна хэмээн Хотын дарга Х.Нямбаатар мэдээлж байсан ч төрийн бага, дунд шатанд газрын наймаа, авлига, дээрмийн асуудал энэ мэтээр байгааг дээрх нөхөд харуулж байгаагийн тодхон жишээ энэ буюу.

С.Баяр