Э.Дюркгейм гэж социологийн ухааны суут эрдэмтэн байлаа. Энэ эрдэмтэн судалгаагаараа “мэргэжлийн бүлэг” гэсэн онолын нэр томьёог боловсруулан шинжлэх ухааны эргэлтэд оруулсан байдаг. Тэрээр зөвхөн мэргэжлийн бүлэг л мэргэжлийн ёс зүйг тээж чадна, ингэснээр тухайн салбарт зохистой бодлого, зүй зохистой гаргалгаа бий болно гэж дүгнэсэн юм.  Ямартай ч социализмын жилүүдэд салбарын удирдлага сайд нар тухайн салбарынхаа мэргэжилтэн, насаараа тухайн салбартаа зүтгэсэн хүмүүс байдаг байсансан. Гэтэл 1990- оноос хойш салбарын бодлого бол улс төрийн бодлого байх учиртай гэсэн гаргалгаа гаргаж, улс төрийн намуудын шугамаар хаа хамаагүй хүмүүс сайд тэр байтугай газар, хэлтэс, бүр тасгийн дарга болчихсон тууж явдаг болсон.

Монголын өнөөгийн нийгмийн улс төрийн гажуудлын үндэс нь энд л бий. Эрх мэдэл нь эрх хүүхдийн сүйн бөгжний шалтгаар ганхаж, өнөө маргаашгүй бутарч магадгүй болчихоод буй Л.Оюун-Эрдэнийн Засгийн газарт ч уг асуудал бий. Шуудхан хэлэхэд, энэхүү хамтарсан засгийн мэргэжлийн, салбартаа ажиллаж ирсэн цор ганц сайд нь Эрүүл мэндийн сайд. Бусад сайд нарын хувьд тухайн салбартаа сайд болохоосоо өмнө нэг ч хоног ажиллаж байгаагүй хаа хамаагүй хүмүүс.  

Тэргүүн шадар бөгөөд эдийн засаг хөгжлийн сайд Лу.Гантөмөр элекроникийн мэргэжилтэй бол Бүсчилсэн хөгжлийн асуудал эрхэлсэн шадар сайд Т.Доржханд төрийн санхүүч мэргэжилтэй. Эрчим хүчний сайд Б.Чойжилсүрэн автоматикч, телемеханикч бол Аж үйлдвэр, эрдэс баялгийн сайд Ц.Туваан анагаах ухааны мэргэжилтэн, их эмч. Харин Соёл, спорт, аялал жуулчлал, залуучуудын сайд Ч.Номин нягтлан бодогч бөгөөд Батлан хамгаалахын сайд С.Бямбацогт Эдийн засаг, бизнесийн удирдлагыг чиглэлийн мэргэжилтэн.  Цаашлаад Боловсролын сайд П.Наранбаяр Олон улсын харилцааны мэргэжилтэн, Цахим хөгжил инновац харилцаа холбооны сайд Ц.Баатархүү улс төр судлаач, нийгмийн тухай мэдлэгийн багш гээд хөвөрнө.