Гашуун сухайтын Төмөр замын холболтын БНХАУ, Монгол Улсын Засгийн газар хоорондын гэрээг үзэглэх арга хэмжээ, хоёрдугаарт 14 стратегийн ордын 34-өөс 51 хувийг баялгийн санд төвлөрүүлэх нь энэ засгийн хувьд хамгийн чухал ажил нь. Нөгөөтэйгүүр Ухаа худаг, Цагаан суварга тэргүүтэй стратегийн ордуудыг эзэмшигч МСS, МАК зэрэг компаниуд өдгөө засгийн эрхээс шахагдан гарсан МАН-ын ахмад үеийг санхүүжүүлж ирсэн нь нууц биш. Өдгөө  Л.Оюун-Эрдэнэ, Л.Амарбаясгалан нарын тэргүүлсэн залуу МАН энэ санхүүжилтээс татгалзсан нь бас үнэн. Тэгвэл залуу МАН-ын бүлэглэл санхүүгийн хувьд ямар эх үүсвэрт тулгуурлах вэ… 

Таван толгой дахь Бор тээгийн орд уу. Халзан бүрэгтэйн газрын ховор элементийн орд уу гэх мэт олон асуудал ирэх жилүүдэд биднийг хүлээж байна. Талбай дээрх “Огцрох амархан” жагсаал бол дараагийн асуудал. Энэ бүгдээс харахад Монгол төрийн эрх мэдэлд үе шилжилт буюу генерацын үйл явц засгаас шахагдсан ахмад МАН-ын санхүүжүүлэгч бүлэглэл, залуу МАН-ын бүлэглэлийн хоорондох хурцадсан сөргөлдөөнөөр үргэлжилж байна. 

Сөргөлдөөн залуу МАН-ын давамгайллаар өндөрлөх үү, аль эсвэл ашиг сонирхлын хил хязгаараа тохиролцсон зөвшилцөлд хүрэх үү гэдгийг монголчууд бид нэг их удахгүй харах байх. Яг энэ шилжилтийн үед МАН-ын генсек Я.Содбаатарын намуухан гэж өхөөрдүүлдэг сулбагар төрх Монголын ууган улс төрийн хүчний хүчийг тарамдуулж байна гэх шүүмжлэл газар авлаа. Хэдийгээр 2024 оны сонгуулийн дүн, парламентад олон нам, эвслийн төлөөллийг суух боломж олгосон ч  ялсан намын дарга Л.Оюун-Эрдэнэ Засгийн газрыг хамтран байгуулсан нь нэг талаар суурь хундаамаа бататгах гэсэн алсын харааных нь нэг байсан биз ээ. Үүний үр дүнд өнөөгийн МАН-ын генсек аажуу уужуу сууж байх нь хэр. 

МАН-ын Ерөнхий нарийн бичгийн дарга гэдэг намдаа хоёр дахь том албан тушаалтан. Намынхаа бодлогыг зангидахаас гадна удирдлагаар хангаж, нам доторх фракц, бүлэглэлүүдийн эрх ашгийг хангах, парламентад суудалтай намуудтайгаа ойлголцож ажиллах шаардлагатай. Улс төр судлаачдын хэлж буйгаар Засгийн сайд нараасаа ч том амьтан. Парламентын ардчиллыг хангахад эрх баригч намын оролцоо чухал. Тэр утгаараа хамтарсан засаг байгуулагдсан энэ цаг үед парламентад суудалтай намуудтай ойлголцолд Я.Содбаатарын чадвар, мэдрэмж, туршлага нэн чухал. Гэвч мань эрийн мэдрэмж ихээ өөр зүйлд л төвлөрөөд байх шиг… 

Монголын парламентад 2012-2016, 2016-2020 онд хоёр удаа сонгогдож, Зам, тээврийн хөгжлийн сайдын албыг хашиж, Шадар сайдаар ажиллаж асан түүнийг төрлөө төрийн албанд шургуулах, төрийн тендерт хуруу гараа дүрэхдээ сайн гэх хов бас бий. Хол ойрын хов живийг алгасан сошиал ертөнцөд шуугиан тариад амжсан түүний бэр Б.Намууны тансаглалын мэдээг эргэн сануулья. Сайн хүнйи нэрийг түмэндээ худалдаж идэв гэдэг шиг цадигаа алдсан дарга нарын хүүхдүүдийн тансаглал хэрээс хэтэрч, чангалах бүс ч үгүй болсон иргэдийн эгдүүг хүргэж байгаа нь гашуун үнэн.  Боож үхэхэд бор шидмэс олдохгүй гэдэг шиг аргаа барсан, таварт дарлуулсан, мөнгөний ханшны уналтад сөхөрсөн иргэд эдүгээ эрхэм дээд дарга нарын эргэн тойрныхныг үзэн ядах их аянд сошиал орчинд нэгдсэн нь бодит амьдрал. Ямартай ч сошиалд хэрүүлийн алим тарьсан Я.Содбаатарын бэрийн тансаглал өнөөдөр шүүрдсэн ч гарч ирэхгүй байна. Энгийнчилбэл ихээ мөнгө цацаад устгуулчихсан гэсэн үг. Хардах эрхээ эдлээд улиглачихад генсек та төрийн эрх мэдлийн шилжиж буй түүхэн цаг үеийн үүрэг хариуцлагаа үл ухамсарлан, арай өөр тийшээ анхаарал, мэдрэмжээ илгээгээд байгаа юм биш биз...