ЮНЕСКО-ийн Дэлхийн өвийн хорооны 45 дугаар чуулган 2023.09.10-25-ны өдрүүдэд үргэлжилэн зохион байгуулагдаж байна. Дэлхийн өвийн хорооны 45 дугаар чуулганаар Монгол улс дахь “Буган чулуун хөшөө, хүрлийн үеийн холбогдох дурсгалуудыг” Дэлхийн өвийн жагсаалтад буюу ЮНЕСКО-д бүртгэж авчээ.
Буган чулуун хөшөө нь хүрлийн цаг үеийн Төв Азийн нүүдэлчдийн бүтээсэн соёлын орон зайг танин мэдэх, нүүдэлчдийн угсаа гарвал, нийгэм, аж ахуй, соёл, овог аймаг хоорондын харилцаа холбоо зэрэг олон талт ой санамжийг бүрдүүлэхэд чухал үүрэг гүйцэтгэдэг түүх, соёл, урлаг, гоо зүй, танин мэдэхүйн асар их мэдээллийг агуулсан, нандин, дахин давтагдашгүй, хосгүй үнэт өв юм.
ЮНЕСКО-ийн Дэлхийн байгалийн болон соёлын өвийг хамгаалах тухай конвенц нь байгалийн болон соёлын өвийг хамгаалж, таниулан сурталчлах, хойч үедээ үлдээх зорилгоор 1972 онд батлагдсан байдаг. Монгол Улс тус конвенцод 1990 онд нэгдэн орсноосоо хойш Дэлхийн өвийн жагсаалтад нийтдээ зургаан байгаль, соёлын өвийг бүртгүүлсэн байна.