АНУ-ын Конгрессийн Төлөөлөгчдийн танхимын дарга Нэнси Пелосиг Тайваньд гэнэтийн айлчлал хийсэн нь Хятад, Тайванийн асуудлыг улам хурцатгаж, дэлхий нийтийн анхаарлыг төвд оруулав. 

АНУ-ЫН 26 СЕНАТОР ПЕЛОСИГИЙН АЙЛЧЛАЛЫГ ДЭМЖИВ

АНУ-ын Ерөнхийлөгч Жой Байдены хувьд Пелосигийн энэ айлчлалыг албан бус гэж тодотгосон. Тэгвэл "Ардчиллыг хамгаалахын төлөө" үүнийг хийсэн гэж мэдэгдсэн Пелосигийн айлчлалыг АНУ-ын 26 сенатор хамтарсан мэдэгдэл хийж, дэмжиж буйгаа илэрхийлэв. 

Пелоси Тайваньд /2022.08.02-ны 22:44 цаг/ газардсаныхаа дараа "Дэлхий нийт дарангуйлал, ардчиллын нэгий сонгох мөчлөгт ирээд байна. Бид Тайваньд айлчилснаар ардчиллын төлөөх амлалтаа хүндэтгэж байна" хэмээн жиргэсэн.

Америк чипний үйлдвэрлэлийг Хятадтай өрсөлдөхүйц ХҮЧИРХЭГЖҮҮЛНЭ ГЭВ

Түүний хувьд өнөөдөр Тайваний парламентад үг хэлж, Ерөнхийлөгч Цай Инвэньтэй болон хүний ​​эрхийн төлөө тэмцэгчидтэй уулзжээ. Тэрээр Ерөнхийлөгч Цай Ин Вэнийг Тайванийг удирдаж байгаад талархаж, парламент хоорондын хамтын ажиллагааг нэмэгдүүлэхийг уриалсан бол Тайванийн парламентад үг хэлэх үеэрээ "Бид Тайванийг дэлхийн хамгийн эрх чөлөөт нийгэмлэгүүдийн нэг гэдгийг сайшааж байна" гэжээ. Мөн "Америкийн чипний үйлдвэрлэлийг Хятадтай өрсөлдөхүйц хүчирхэгжүүлэх зорилготой АНУ-ын шинэ хууль тогтоомж нь АНУ-Тайванийн эдийн засгийн хамтын ажиллагаанд илүү их боломжийг олгох болно" гэдгийг онцолсон байна.

Пелоси Тайваньд очсон АНУ-ын анхны Төлөөлөгчдийн танхимын дарга биш ч (Ньют Гингрич 1997 онд айлчилж байсан) түүний айлчлал Бээжин, Вашингтон хоёрын харилцааг эрс муутгаж орхив. Учир нь Тайванийг Хятадтай эдийн засаг, цэрэг арми, геополитикийн хувьд 25 жилийн өмнөхтэй харьцуулахад хавьгүй илүү хүчирхэг болсон үед нь ирснээрээ онцлог гэдгийг судлаачид тодотгож буй.

Хятад улс Тайванийг өөрийн нутаг дэвсгэрийн нэг хэсэг гэж үздэг бөгөөд өөрийн мэдэлд оруулахын тулд шаардлагатай гэвэл хүч хэрэглэхээ мэдэгдсээр ирсэн. Тиймээс АНУ энэ айлчлалыг Тайванийн эсрэг цэргийн ажиллагаа явуулах шалтаг болгон ашиглахгүй байхыг Хятадад анхааруулаад байна.

ХЯТАД ТАЙВАНЬТАЙ ХИЙДЭГ ЗАРИМ ЭКСПОРТ, ИМПОРТОО ЗОГСООВ

Хятад улс АНУ-ын сүүлийн 25 жилийн хугацаанд Тайваньд хийсэн дээд хэмжээний энэхүү айлчлалыг Тайванийн хоолойн энх тайван, тогтвортой байдалд заналхийлж байна гэж буруушааж буй. Үүнтэй холбогдуулан Бээжин дэх АНУ-ын элчин сайдыг дуудаж, Тайваниас хэд хэдэн хөдөө аж ахуйн импортыг зогсоосноо мэдэгдээд байна.

Тухайлбал, Хятад улсын Гаалийн газраас Тайванаас орж ирэх цитрус жимс зэрэг зарим бүтээгдэхүүний импортыг түр зогсоосон бол Худалдааны яам нь Тайвань руу байгалийн элс экспортлохоо зогсоосноо мэдэгдлээ.

ТАЙВАНИЙН АГААРЫН ДОВТОЛГООНООС ХАМГААЛАХ БҮСЭД ХЯТАДЫН 21 ОНГОЦ ОРЖ ИРСЭН Ч ПЕЛОСИ АЮУЛГҮЙ ГАЗАРДЖЭЭ

Пелосиг Тайвань руу нисч байх үед Хятад улс Тайванийн агаарын довтолгооноос хамгаалах бүс буюу ADIZ руу 21 цэргийн онгоц илгээсэн байсан талаар Тайванийн Батлан хамгаалах яамнаас мэдээлжээ.

Тодруулбал, Ардын чөлөөлөх армийн Агаарын цэргийн хүчний 10 Шэньян J-16 сөнөөгч онгоц, Шэньян J-11 сөнөөгч 8 онгоц, KJ-500 агаарын эрт зарлан мэдээлэх, хянах нэг нисэх онгоц, Шаанси Y-9 электрон байлдааны онгоц, Шаанси Y-8 нэгийг тус тус илгээснийг Тайванийн ADIZ-ийн баруун өмнөд буланд хянаж байсан гэжээ. 

Үүний хариуд Тайвань нисэх онгоц илгээж, радиогоор сэрэмжлүүлэг өгч, PLAAF онгоцуудыг хянахын тулд агаарын довтолгооноос хамгаалах пуужингийн системийг байрлуулж ажиллажээ. ADIZ гэдэг нь тухайн улсын агаарын орон зайг давж, нислэгийн удирдагчид ирж буй онгоцноос өөрсдийгөө таниулахыг хүсдэг газар нутаг буюу агаарын довтолгооноос хамгаалах бүс юм.

Нийтдээ энэ сарын байдлаар Хятад улс Тайванийн таних бүс рүү 22 сөнөөгч онгоц, гурван споттер онгоц зэрэг 25 цэргийн онгоц илгээжээ.

Пелосигийн айлчлалыг "Тайваний хоолойн энх тайван, тогтвортой байдалд ноцтой хохирол учруулж, Хятад, Америкийн харилцааны улс төрийн үндэст ноцтой нөлөө үзүүлж, Хятадын бүрэн эрх, нутаг дэвсгэрийн бүрэн бүтэн байдалд ноцтой халдаж байна гэж Хятадын ГХЯ-аас мэдэгдсэн. Мөн АНУ Тайваньтай албан ёсны дипломат харилцаагүй ч Америкийн хуулиар өөрийгөө хамгаалах хэрэгслээр хангах үүрэгтэй. АНУ-ын албаны хүмүүс Тайваньд айлчилж байгаа нь тус арлын тусгаар тогтнолыг дэмжигчдэд урам зориг өгсөн дохио гэж Хятад улс үзэж байна.

Тайвань арлын ирээдүйг зөвхөн Тайваний ард түмэн шийдэж чадна гэж мэдэгджээ.

Хятадын Ардын чөлөөлөх арми маргаашнаас буюу энэ сарын 4-7-ны хооронд Тайвань арлын ойролцоох зургаан бүсэд шууд галын сургуулилт болон бусад цэргийн сургуулилтуудыг хийхээ зарласан юм. Заасан хугацаанд тухайн бүсэд өөр бусад онгоц нэвтрэхийг хориглоод байна.

8-р сарын 4-7-ны хооронд Хятадын цэргийн сургуулилт хийх бүсүүдийг харуулсан газрын зураг.  (PLA зураг)

Үүний хариуд Тайванийн Батлан хамгаалах яамнаас арлын эргэн тойронд сургуулилт хийж, гол боомт, хотуудыг заналхийлэхийг оролдож, ард иргэдийг айдас түгшүүрт автуулах гэсэн оролдлого. Шаардлагатай үед шийдэмгий шийдвэр гаргаж ажиллах болно" гэдгээ мэдэгдээд байна.