Монголчуудын нэг айдас нь Хятадууд манай улсыг эзлэх. Үе үе цахим орчинд олон тооны хятад иргэн хууль бусаар хил нэвтэрч, Монголд дураараа дургиж, эзэн сууж байна гэх бичлэг, зураг хөвөрнө. Өнөөг хүртэл тэдгээр бичлэг, зураг бүр үнэн эсэх нь батлагдаагүй тул тэрхэн зуураа уурссан Монголчууд сүртэй гэгч нь сэтгэгдэл бичээд өнгөрдөг байв.

Гэтэл жинхнээсээ бодит аюул нүүрлэж эхэлжээ.

Монгол Улсын Хилийн тухай хуулийн 26.1-д "Улсын хилийн дэглэмийг сахиулах, улсын хил хамгаалалт, шалган нэвтрүүлэх албыг зохион байгуулах, хилийн инженер, техникийн байгууламж барих зориулалтаар улсын хилийн шугамаас дотогш 15 км-ээс илүүгүйгээр тусгай журам тогтоосон нутаг дэвсгэрийг улсын хилийн зурвас гэнэ" хэмээн заасан байдаг.

Гэтэл хилийн зурвас бүс буюу Дорнод аймгийн Баянтүмэн сумын хоёрдугаар багийн нутаг дэвсгэр буюу хилийн шугамнаас ердөө 7 км зайд “Меланж” ХХК хүрэн нүүрсний уурхайн олборлолт хийхээр, хөрсийг хуулаад эхэлжээ.  

Тус уурхай 94 сая тонн нөөцтэй буюу 58 жил олборлолт хийнэ. Үүнээс үзэхэд, Монгол Улсын хилийг 58 жилийн турш ухаж, тэнд хэдэн зуун хүн ажиллах дүр зураг харагдана.

“Меланж” ХХК-ийн уурхайн үйл ажиллагаа явуулж байгаа газар нь нутгийн иргэдийн хадлангийн бүс нутаг бөгөөд ган гачиг, зудтай үед оторлож “амь аврагддаг” бэлчээрийн нөөц газар гэдгийг нутгийн иргэд хэлж байлаа.

Малын бэлчээрийн нөөц газарт уурхайн олборлолт хийгээд зогсохгүй, хаа сайгүй машин зам гарган, том машинууд нь малчдын гэрийн үүдээр дайрах шахам өнгөрч нутгийн иргэдийг тайван амьдрах аргагүй болгож, эхэлсэн байна. Энэ талаар нутгаасаа сонгогдсон гишүүд болох Ц.Сэргэлэн, Х.Болорчулуун нарт “уурхайн үйл ажиллагааг зогсоогоод өгөөч” гэх хүсэлтийг олон удаа тавьсан ч өнөөдрийг хүртэл арга хэмжээ аваагүй байна.

Эргэн сануулахад, УИХ-ын гишүүн Ц.Сэргэлэн 2021 оны арванхоёрдугаар сард албан тоотоор уг асуудалтай тэмцэж, уурхайн үйл ажиллагааг зогсоохоо илэрхийлсэн. Гэвч үүнээс хойш таван сар өнгөрөхөд эрхэм гишүүн хуруугаа ч хөдөлгөсөнгүй. Харин уурхайн үйл ажиллагаа өдрөөс өдөрт хүрээгээ тэлж, хүчээ нэмсээр байгаа юм.

Харин Х.Болорчулуун гишүүнд нутгийн иргэд нь итгэхгүй байгаа тул хандаагүй гэнэ. Тэд “Х.Болорчулуун гишүүн камерны өмнө иргэдийнхээ талд орчихоод, эргэж хараад уурхайн талд ордог. Тиймээс итгэл алдарсан" гэдгээ хэлж байв.

Ах, дүү, хань, хамаатнаараа нийлээд улсынхаа ДАРХАН ХИЛДЭЭ ХАЛДАЖ, УХАЖ СЭНДИЙЧЭЖ Л БАЙГ УУ ГИШҮҮД ЭЭ!

ҮРГЭЛЖЛЭЛ БИЙ...