Гаргасан шийдвэр бүр нь олны хайр, хүндэтгэлийг хүлээж, олон нийтийн сүлжээнд таних хүн үгүй болсон Дархан-Уул аймгийн Засаг дарга Б.Азжаргалын хөрөнгө, орлого ковидын үед огцом нэмэгджээ.

Түүний жилийн орлого 2019 онд 40 сая төгрөг байсан бол 2020 онд 62 сая, 2021 онд 110 сая төгрөг болж, хоёр дахин өссөн байна.

Мөн гэр бүлийн жилийн орлого нь 84 саяас 136 сая төгрөг болж өсжээ. Үүнээс гадна тэрбээр нийтийн дөрвөн орон сууц, зуслангийн нэг байшин, үйлчилгээний нэг сууц, нэг авто гарааштай бөгөөд эдгээр хөрөнгөө 380 сая төгрөгөөр үнэлсэн байна. 2020 онд 83 сая төгрөгийн үнэ бүхий “Prado” маркийн автомашинтай байсан бол 2021 онд 130 сая төгрөгийн үнэтэй “Ланд-200” маркийн автомашинтай болж, төмөр хүлгээ сольжээ.

Ковидын хүндрэл, эдийн засгийн хямралаас үүдэн иргэд байтугай бизнес эрхлэгчдийн орлого огцом уруудсан энэ үед  хурган дарга нар, төсвийн захиран зарцуулагч эрх мэдэлтнүүдийн халаас түнтийж, хөрөнгө орлого нь хэдэн зуун саяар өссөөр байгаа нь эрхгүй  хардлага төрүүлнэ.

Тэгвэл Б.Азжаргал даргын дан ганц хөрөнгө орлого өссөн нь гайхмаар хэрэг биш ажээ. Тэрбээр Тамгын газрын даргаараа тушаал гаргуулж, төсвийн мөнгөөр өөрийгөө цалингийн 40 хувиар шагнаад амжжээ.

Түүний хувьд Дархан хотын захирагчаар ажиллаж байгаад, 2020 оны сонгуулийн үр дүнд Аймгийн Засаг дарга болсон. Ажлаа авснаасаа хойш нийгмийн сүлжээнд гарсан аар саар гэлтгүй бүхий л асуудлаар шуурхай шийдвэр гаргаж, ажил хэрэг болгодогоороо “хамгийн лаг” даргаар нэрлэгдээд буй.

Гэвч учир мэдэх хүмүүс түүнийг сошиал тагнаад сууж байдаг, поп нэгэн гэх юм билээ.

Б.Азжаргалын миний санаачилга гэж цээжээ дэлдэн хийж буй бүхий л ажил Дарханы өмнөх дарга нарын үеэс сууриа тавьсан, батлагдсан, зарим нь хэдийн хэрэгжээд эхэлсэн ажлууд байсан гэдэг. Харин тэрбээр нийгмийн сүлжээнд идэвхтэй, пи-ар сайтай учраас шинэ санаачилга мэтээр харагдуулахдаа гарамгай гэх.

Ийнхүү “сайн дарга”-ын саар асуудлууд олонд эхнээсээ илчлэгдээд эхэллээ.