“Хөдөөгийн сэргэлт–Шинэ Дундговь” хөтөлбөрийн хүрээнд XVII жарны “Сүрээр дарагч” хэмээх гал морин жилийн сар шинийн баярт зориулсан хүчит бөхийн барилдааныг зохион байгууллаа. Тус барилдаанд улс, аймаг, сумын алдар цолтой 32 бөх зодоглон хүч, уран мэхээ сорин барилдав.

Барилдааны нээлтийн ажиллагаанд аймгийн Засаг дарга С.Мөнхчулуун, ИТХ-ын төлөөлөгч С.Доржпүрэв, аймгийн Биеийн тамир, спортын газрын дарга Б.Өлзийбаяр нар оролцож, бөхчүүдэд амжилт хүсэв.

Энэ удаагийн барилдаанд Дундговь аймгийн Эрдэнэдалай сумын харьяат, Аймгийн арслан Х.Чойжилсүрэн түрүүлж, Булган аймгийн Сайхан сумын харьяат, Аймгийн арслан Н.Намнансүрэн үзүүрлэлээ. Их шөвгийн дөрөвт Дундговь аймгийн Эрдэнэдалай сумын харьяат, Улсын харцага Э.Даш, Булган аймгийн Могод сумын харьяат, Улсын начин Э.Энх-Амгалан нар шалгарч, шагналаа гардан авлаа.

Мөн сар шинийн баярт зориулсан өсвөрийн үндэсний бөхийн барилдаанд Дэрэн сумын өсвөрийн бөх Ч.Итгэлт түрүүлж, “Эрдмийн далай” сургуулийн бөх Г.Жавхлантөгс үзүүрлэв. Их шөвгийн дөрөвт “Говийн-Ирээдүй” сургуулийн бөх Д.Гандорж, н.Магванжав нар шалгарав.

Түүнчлэн Дундговь аймгийн Сайнцагаан сумын Засаг даргын Тамгын газар, Биеийн тамир, спортын газар, Сайнцагаан сумын Улсын тэргүүний 3-р цэцэрлэг хамтран зохион байгуулсан “Хуйрнан шуугигч” үндэсний бөхийн барилдаанд 5-р цэцэрлэг С.Даваасүрэн түрүүлж, Б.Ариунтөгс үзүүрлэн, 3-р цэцэрлэг Г.Намхайдорж, 5-р цэцэрлэг Б.Батцэнгэл нар их шөвгийн дөрөвт шалгарч шагналаа гардан авав.

Хүчит бөхийн барилдааны уран барилдааны тусгай шагналыг Дундговь аймгийн Бурхан шашинтны төв Дашгэнпэллин хийдээс олгосон бөгөөд уг шагналыг Аймгийн арслан Х.Чойжилсүрэн хүртэж, хийдийн лам хуврагууд гардууллаа.

Түрүүлж, үзүүрлэсэн болон их шөвгийн дөрөвт шалгарсан бөхчүүдэд шагналыг аймгийн Засаг дарга С.Мөнхчулуун, ИТХ-ын дарга Ж.Мөнхчулуун, ИТХ-ын төлөөлөгч С.Доржпүрэв болон аймгийн Биеийн тамир, спортын газрын дарга Б.Өлзийбаяр нар гардуулав.