Британийн парламентад Бүх намын Монголын бүлэг шинээр байгуулагдаж, хоёрдугаар сарын 2-нд болсон нээлтийн хуралдаанаа хийжээ.

Нээлтийн хуралдаанд Монгол Улсаас Их Британи, Умард Ирландын Нэгдсэн хаант Улсад суугаа Элчин сайд Б.Энхсүх оролцсон байна.

Энэхүү бүлгийг парламентын гишүүн Жэймс Вайлд санаачлан байгуулж даргалж буй бөгөөд дэд даргаар парламентын гишүүн Кэтрин Уэст, албан тушаалтнаар парламентын гишүүн Дэйв Дуган, Баронесс Нортховер нар томилогдож, парламентын 20 гаруй гишүүн нэгдэн оржээ. Нээлтийн хуралдаанд парламентын гишүүн Жэймс Вайлд, Кэтрин Уэст, Дэйв Дуган, Фабиан Хамилтон, Баронесс Нортховер, Баронес Эванс, Лорд Кромвелл, Баронесс Уддин, Баронесс Хүүпер, Лорд Кортаун нар байлцсан байна. Мөн Британийн Гадаад хэрэг, хамтын нөхөрлөл, хөгжлийн яамны Зүүн хойд Азийн газрын дэд захирал Карен Маддокс, Улаанбаатар дахь Британийн Элчин сайдын яамны Элчин зөвлөх Софи Уоррел зэрэг албаны хүмүүс оролцжээ.

Бүх намын Монголын бүлэг анх 1995 онд байгуулагдаж байсан бөгөөд Монгол–Британийн харилцааны асуудлаар хэлэлцүүлэг өрнүүлэх, Британийн Засгийн газарт асуулга тавьж, мэдээлэл авах, улмаар парламентын хүрээнд шаардлагатай дэмжлэг үзүүлэх чиглэлээр идэвхтэй ажиллаж ирсэн.

Монгол Улс шилжилтийн үеийн хүнд цаг үеийг даван туулахад Британийн парламент дахь үе үеийн Бүх намын Монголын бүлгийн гишүүдийн дэмжлэг чухал үүрэг гүйцэтгэж байсан түүхтэй. 

Дахин байгуулагдсан Бүх намын Монголын бүлгийн гишүүд чухал түүхий эд, сэргээгдэх эрчим хүч, байгаль орчин, эмэгтэйчүүдийн нийгэмд эзлэх байр суурь, аюулгүй байдал зэрэг чиглэлээр Монгол Улсын Засгийн газрын авч хэрэгжүүлж буй бодлого, үйл ажиллагааны талаар дэлгэрэнгүй мэдээлэл авч, эдгээр салбарт Монгол, Британийн харилцаа, хамтын ажиллагааг идэвхжүүлэхэд парламентаас дэмжлэг үзүүлэн ажиллах сонирхлоо илэрхийлсэн байна. 

"Бүх намын бүлгийг парламентын гишүүд сонирхсон улс, асуудлын хүрээнд сайн дурын үндсэн дээр байгуулдаг бөгөөд парламентад суудалтай гол улс төрийн намуудын 20-иос доошгүй төлөөлөл багтсан байх ёстой. Бүлэг байгуулах журам шинэчлэгдэж, нэг гишүүн албан ёсоор 6 хүртэлх бүлэгт нэгдэх боломжтой болсон нь шинэ бүлэг байгуулахад хязгаарлагдмал болсон. 2024 онд шинээр бүрэлдсэн Британийн парламентад шинэчилсэн журмын дагуу Бүх намын Монголын бүлэг шинээр байгуулагдсан нь Британийн парламентаас Монгол Улсад чухал ач холбогдол өгч буйн илэрхийлэл юм" хэмээн Их Британи, Умард Ирландын Нэгдсэн хаант Улс дахь Монгол Улсын ЭСЯ-наас мэдээллээ.