Тамирчдын хувцсыг “Гоёл Кашмер” ХХК-ийн загвар зохион бүтээгчид, оёдолчид урлажээ. Тэд уламжлалт дээл хувцсыг орчин үеийн загварт хослуулахаас илүүтэй, аугаа их түүх, өв соёлын маань салшгүй хэсэг болсон эртний монгол хувцасны соёлыг өнөө цагт дахин таниулж, дэлхий дахинд хүргэхийг зорьсон гэдгийг пэйж хуудсаараа дамжуулан мэдээлэв.

Манай улсын хамгийн хүчирхэг түүхэн үе болох XIII-XV зууны Их Монгол Улсын үеийн дээл хувцсыг үндэс болгон бүтээсэн энэхүү загвар нь хөдөлгөөнд саадгүй хормойн оноо, салхи хүйтнээс хамгаалах мөөрөлжин зах, элэг тэвэрсэн битүү энгэр зэрэг уламжлалт шийдлийг хадгалсан байна. Зөөлөн тансаг монгол ноолуурыг гоёмсог торгоор эмжин, уламжлалт эвэр угалз хээг хатган, ёслол хүндэтгэлийн хэв маяг шингээжээ.

Нүүдэлчин ард түмний хатуу өвлийг даван туулахад түшиг болж ирсэн монгол ноолуураар уламжлалт түүх соёлыг хадгалсан ёслолын дээл болон барууны соёлд түгэн дэлгэрсэн уулын цанын ноосон цамцнаас сэдэвлэж, монгол гэр, ахуйн дүрслэлээр баяжуулсан ноолууран сүлжмэл чөлөөт хослолуудыг дээд зэргийн чанараар урласан байна.

Хүн төрөлхтний эв нэгдлийн бэлгэ тэмдэг болсон өвлийн олимпын наадамд манай улсын баг тамирчид ийнхүү үндэсний өв уламжлал, орчин үеийн загварыг хослуулсан ёслолын хувцастай алхах юм.

2005 онд байгуулагдсан "Гоёл Кашмер” ХХК 200 гаруй ажилтантай үндэсний тэргүүлэх үйлдвэрлэгчдийн нэг юм. Тус компани зуун хувь ноолуур, торгон ноолуур, сарлагийн хөөвөр болон бусад материалаар жилд 300 мянга гаруй сүлжмэл, нэхмэл, оёмол бүтээгдэхүүн үйлдвэрлэж, 10 гаруй улсад экспортолдог аж.