Энэ оны эхний 10 сарын хугацаанд Японы ногоон цайны экспорт сүүлийн 70 гаруй жилийн хамгийн өндөр түвшинд хүрснийг засгийн газар болон салбарын статистик мэдээлэл харууллаа. Ийнхүү өсөхөд ногоон цайны мача нунтгийн гадаадын зах зээл дэх эрэлт огцом нэмэгдсэн, мөн Японы иений ханш суларсан нь нөлөөлжээ.   Тодруулбал, энэ оны 1-10 дугаар сарын хооронд ийм цайны экспорт өнгөрсөн оны мөн үеийнхээс 44 хувиар өсөж, 10 084 тоннд хүрчээ. АНУ мөн хугацаанд хамгийн их буюу 3497 тонн цай импортолсон бол Тайвань, Тайланд, Герман удаалж байна.

Ногоон цайны экспорт сүүлийн есөн жил дараалан өсөж байгаа нь эрүүл мэнддээ анхаардаг хилийн чанад дахь хэрэглэгчдийн дунд Японы хүнсний бүтээгдэхүүний нэр хүнд өсөж байгааг харуулж байна.

Гэхдээ хилийн чанад дахь борлуулалт өссөн хэдий ч жилийн нийлүүлэлтийн хэмжээ 1954 онд хамгийн дээд түвшинд буюу 11 553 тоннд хүрч байснаасаа хойш 10 мянган тонноос доогуур хэвээр байсан нь Хятад цайны нэр хүнд өссөнтэй холбоотой байна. Японд ногоон цайны эрэлт буурсан боловч сүүлийн жилүүдэд үйлдвэрлэл буурч байгаатай холбоотойгоор цайны навчны үнэ өсөж байна.

2024 онд Япон улс 74 мянга орчим тонн цайны навч үйлдвэрлэсэн нь 10 жилийн өмнөхөөс 10 гаруй хувиар буурсан үзүүлэлт бөгөөд энэ нь сенча цайны эрэлт буурсан, фермийн аж ахуй эрхэлдэг хүн ам хөгширсөнтэй холбоотой байна. Тус улсын цайны навчны томоохон үйлдвэрлэгч болох баруун өмнөд нутгийн Кагошима мужийн хөдөө аж ахуйн хоршооны мэдээлснээр, 10-11 дүгээр сарын хооронд үйлдвэрлэсэн, ихэвчлэн савласан цайнд ашигладаг навчны үнэ нэг кг нь 2500 иенээс /16 ам.доллар/ дээш байсан нь өмнөх оны мөн үеэс зургаа дахин өссөн үзүүлэлт болжээ.