Засаг тогтвортой байвал гэх ойлголт нам найрамдалтай байвал хэмээн өөрчлөгдсөн цаг үед монголчууд амьдарч байна. Эрх баригч нам доторх сөргөлдөөн энэ улсын ирээдүйг шийддэг болсныг харснаас инагш, засаг нь тогтвортой байх ямар чухлыг яс махандаа тултал ойлгосон ч гэхэд болно. Тэр утгаараа Г.Занданшатарын Засгийн газрыг эвтэй аятай ажиллаад эх орон ардтүмэндээ нэмэр тус болохгүй ч нэмээс болчихолгүй ажиллаад хугацаагаа дундлаасай гэх хүсэл  бий нууц биш. Гэвч Г.Занданшатарын Засгийн газар  сар шинээс өмнө солио холио хийх нь нэгэнт тодорхой болсон тухай улс төрийн хүрээнийхэн шивнэлдэж эхэлжээ.  Тэр ч бүү хэл тэнсэн харгалзах авчихаад, тамга, суудлаа өгөх төдийд ор залгах өрсөлдөөн ч ордонд эхэлчихсэн гэх юм.

Ямартай ч албан бус эх сурвалжаар Аж үйлдвэр, эрдэс баялгийн сайд М.Дамдинням, Сангийн сайд Б.Жавхлан, Байгаль орчин, уур амьсгалын өөрчлөлтийн сайд Б.Батбаатар нарын байр суурийг ганхуулах асуудал хөндөгдөөд эхэлчихсэн бололтой.

Б.Жавхлан сайдын тухайд  “Төсвийн орлого тасарсан нь аж ахуйн нэгжүүд татвараа төлж чадахгүй байгаатай холбоотой” гэж тайлбарласан нь солигдох гол шалтгаан болж буй. Товчхондоо,  Сангийн яам буруугаа татварт сэгсрүүлж данс нь цайсан аж ахуйн нэгж рүү чихэхийг санаархсан нь нийгэмд бухимдал үүсгэсэн. Үнэндээ Монгол Улс 2025 оны төсвөө 27 их наядаар баталсан нь урьд өмнө байгаагүй том хэмжээ. Гэтэл улсын орлогын 90 хувийг татвар бүрдүүлдэг. Өдгөө  төсвийн орлого 5 их наяд орчмоор тасрах нь тодорхой болчихоод буй.

Шуудхан хэлчихэд, эдийн засгийн өнөөдрийн хямрал Сангийн яамыг олон жил толгойлсон сайд Б.Жавхлангийн бодлого, алдаатай тооцооллуудтай салшгүй холбоотой. Төсвийн эзэн нь байсаар ирсэн Б.Жавхлан эдийн засгийн уналтад үүрэггүй мэт царайлаад сууж байж боломжгүй. Сайд буруугүй яам буруутай гэж болохгүй биз дээ.

Д.Дамдинням сайдын тухайд нефтийн бүтээгдэхүүний нийлүүлэлтийг нэмэгдүүлэх, мөн саадгүй явуулахын тулд бүхий л арга хэмжээг авч ажиллаж байна гэдэг ч байдал дээрдээгүй. Хомсдолд орсон иргэд бухимдлаа илэрхийлэхээр, та нар юм үзээгүй мэт банкаа дүүргээд байхаар зохиомол хомсдол үүссэн гэж буруутгадаг. Харамсалтай нь хотынхон өдөр шөнөгүй шатахуунд дугаарлаж, орон нутгийнхан нийлүүлэлт хэвий болохоор нааш цааш явах ажлаа амжуулна гэж суусаар хүйт орчихлоо. Г.Занданшатарын засгийн муухай харагдуулдаг сайд нарын түүчээ нь мань эр. Тиймдээ ч түүнийг буулгах тухай яригдаад эхэлчихсэн хэрэг.

БОУАӨ-ийн сайд Б.Батбаатарын тухайд С.Зоригийн нэрээр нэрлэсэн намыг хувийн нам болгосон гэх шүүмжлэлийн эзэн. Үнэндээ ч  өдгөө ИЗНН-ыг нэг ах, гурван дүүгийн хамтаар удирдан, “Гэр бүлийн нам” болгосон тул намынхныхаа эсэргүүцэлтэй тулгараад буй гэх. Тодруулбал, Б.Батбаатарын төрсөн ах Б.Батцэнгэл, төрсөн дүү Б.Батхүү, Б.Батсайхан нар нь ИЗНН-ын Удирдах зөвлөлийн гишүүнээр ажилладаг бол төрсөн дүү Б.Батхуяг нь тус намын Дэд даргаар ажилладаг гэх. Түүгээр барахгүй салбарын сайдаар томилогдсоноосоо хойш хариуцсан яамандаа ИЗНН-ынхнаа бус хуучин угшил болох АН-ынхнаа ажилд авдаг гэх шүүмж ч бас бий. Энэ мэтийн эргэлзээ хардлагад өртсөн сайд угаас нэр суурь тааруу Засгийн газарт нэмэр болохоос нэмээс болж буй нь ч бас үнэн.

Эцэст нь тэмдэгдлэхэд энэ Г.Занданшатар огт хичээхгүй ч, заяа нь хичээсээр Ерөнхий сайд болтлоо дэвжсэн ч ирээдүй огт харагдахгүй байгааг тамхины цэгээс сонссоноо хов болгон дуулгая.