2025 он лхагва гарагаар эхэлж, лхагва гарагаар өндөрлөж буй. Чингис хаан хэмээн цээжээ дэлдэгсэд, өнгөрсөн түүхээрээ бахархахаас өөр идгүй мунхуурагсад гэх шүүмжийг өөр хоорондоо шидэлцэн суудаг монголчуудын хувьд үдэж буй 2025 он маань улс төр, эдийн засгийн бэрхшээлийг үл тооцвоос бахархал дүүрэн баялаг түүх арвинтай өндөрлөж байна.

Их Эзэн Чингис хааны хүндэтгэл оршоосон "Их хааны өргөө"-ний нээлтийг хийж, өргөөний шүтээн эрдэнэ болох Чингис хааны алтан хөшөө 14 тонн жинтэй, 7 метр өндөр хөшөөг заллаа. Эх орны хөрс шорооноос олдсон алтаар бүхэлд нь бүрсэн бөгөөд хөшөөг бүрэхэд 7 кг алт , их хааны хасбуу тамгыг 999 сорьцтой 100 кг цул алтаар бүтээлээ.

2025 оны Монголын Оюун Ухааны Академийн онцлох тамирчингаар О.Наранзул тодорлоо. Тэрбээр Мемори лиг, Ой тогтоолтын улсын аварга, Оюуны олимпийн аварга, Ой тогтоолтын дэлхийн аваргаар шалгарлаа.

Мөн энэ удаагийн дэлхийн аваргын хамгийн онцлох амжилтыг Монголын оюун ухааны академийн тамирчин, 13 настай Б.Мишээл үзүүллээ. Бээлийн чинээ жаахан охин 10 төрлийн нийлбэр онооны дүнгээр Дэлхийн бага насны аварга болж, 3 алт, 2 мөнгө, 2 хүрэл медаль хүртсэнээс гадна алтан медаль хүртсэн хоёр төрөлдөө дэлхийн рекордыг тогтоолоо.

Товчхондоо, 34 дэх удаагийн Ой тогтоолтын Дэлхийн аварга шалгаруулах тэмцээнд Монголын оюун ухааны академийн шигшээ баг багийн нийлбэр оноогоор түрүүлсэн юм. Ингэснээр Монгол Улс ой тогтоолт, оюун ухааны спортод долоо дахь удаагаа дэлхийд тэргүүлэгч гэдгээ баталлаа.

3х3 сагсан бөмбөгийн Дэлхийн аварга шалгаруулах тэмцээн манай улсад анх удаа болж, миний Монголын дөрвөн охин мөнгөн медаль хүртсэн нь энэ төрөлдөө Монголдоо анхдагч байлаа.

Цахим спортын CS2 төрлөөр дэлхийд томоохон амжилт бүтээж яваа The MongolZ баг Дэлхийн чансааг тэргүүлж, Ази тивийн анхны баг болж, түүхэнд нэрээ үлдээлээ.

Спортын салбарын 2025 оны онцлох амжилтын бас нэг эзэд бол PHYSICAL ASIA шоунд Монгол Улсаа төлөөлөн оролцсон Б.Орхонбаяр ахлагчтай баг тамирчид. 3-хан сая хүн амтай Монгол Улсын баг хүчирхэг гүрнүүдийн эсрэг ширүүн өрсөлдөж, дэд байрт шалгаран Монгол хүн бүрийн цөсийг хөөргөж, бахархал, омогшлыг нь төрүүллээ.

Уг багийн оролцогч, "Шандас ММА" дэвжээний тамирчин, холимог тулаанч Б.Энх-Оргил дэлхийн холимог тулааны шилдэг холбоодын нэг "ONE Championship"-ийн "One Fight Night-38" тэмцээнд ялалт байгуулж, аваргын бүсийг эх орондоо авчирлаа.

Олон улсын жүдо бөхийн холбооны цуврал “ Абу Даби-2025” их дуулга тэмцээнд манай улсаас дасгалжуулагч П.Нямлхагва, Ч.Болдбаатар нарын удирдлага дор нийт 15 тамирчин оролцож, Монгол Улсын баг нэг алт, хоёр мөнгөн медаль хүртлээ. Тэмцээний сүүлийн өдөр эрэгтэйчүүдийн +100 кг-ын жинд Үндэсний шигшээ багийн тамирчин Б.Гончигсүрэн ОХУ-ын жүдоч Тамерлан Башаевыг ялснаар алтан медаль хүртсэн юм. Ийнхүү Монголын жүдочид Абу Дабигийн их дуулгаас нэг алт, хоёр мөнгөн медальтайгаар 52 орноос дөрөвт жагслаа.

"100 буудалт даамын" өсвөр, залуучуудын дэлхийн аварга шалгаруулах тэмцээнд Монгол улсаас 34 тамирчин охид, хөвгүүдийн таван насны ангилалд оролцсон. Есөн өрөг тоглож, 7 өдөр үргэлжилсэн уг тэмцээнд  Монголын баг тамирчид хоёр алт, таван мөнгө, хоёр хүрэл медаль авч багийн дүнгээр алтан медаль авсан амжилтыг дөрөв дэх жилдээ үзүүллээ.

Мөн дуурийн урлагийн дэлхийн шилдгүүдийг тодруулдаг “Opera World” цахим хуудсын жагсаалтыг Монгол Улсын Ардын жүжигчин, Соёлын элч Э.Амартүвшин тэргүүлж “Дэлхийн шилдэг баритон” дуучин боллоо. Тэрбээр  2021 онд ч дэлхийн шилдэг баритон дуучнаар нэрлэгдэж байлаа.

Казакстан улсын Астана хотод анх удаа зохион байгуулагдсан "Silk Way Star" Азийн олон улсын дууны уралдааны Гран при шагналыг  Монголын дуучин Ч.Мишээл /Michel Joseph/ хүртлээ.

Монголоос анх удаа Billboard чартыг тэргүүлж, ЮНЕСКО-гийн “Энх тайвны элч” цолыг хүртэж, дэлхийд танигдсан нь The HU хамтлаг. Тэд  2025 оны 12 дугаар сарын 31-нд төв талбайд зохион байгуулагдах “Улаанбаатарын мөнгөн шөнө-2025” шинэ жилийн тоглолтод оролцож, он солигдох торгон мөчийг Монгол түмэнтэйгээ хамт угтах болно. 

МОНГОЛ БАХАРХАЛ