“Шар гэгээ” уран сайхны киног үзэгчдэд хүргэсэн баг, уран бүтээлчид дараагийн уран бүтээлээ толилуулахад бэлэн болжээ. Энэ удаад тус баг Хөдөлмөрийн баатар, Ардын уран зохиолч Б.Лхагвасүрэнгийн “Дутуу хээтэй тооно” жүжгийн зохиолоос сэдэвлэн “Задлаагүй захиа” уран сайхны кино бүтээсэн байна. “Аранжин пикчерс”, “Promix sound”, “Red point media”, “SO media” хамтран бүтээсэн тус уран бүтээлийг 2026 оны эхний сард үзэгчдийн хүртээл болгох юм.

Тэгвэл энэхүү “Задлаагүй захиа” кино багийнхан “Аавдаа бичих захидал” уралдаан зарлаж байна.

Аавдаа байнга хэлж чаддаггүй ч зүрхэндээ тээж явдаг талархал, уучлал, дурсамж, хайр, гуниг, бахархал зэрэг сэтгэлийн үгсийг захидал хэлбэрээр бичнэ.

Уралдаан нь эцэг хүний үнэ цэн, хайр, хариуцлагыг сануулж, хүмүүсийн зүрхэнд хадгалагдаж үлдсэн аавдаа хэлж амжаагүй үгсийг цаасан дээр буулгах, гэр бүлийн дотно харилцааг дэмжих зорилготой.

Уралдааны захидлыг 16 нас хүртэл, 17 наснаас дээш гэсэн хоёр ангиллаар шалгаруулна.

Захидлыг монгол хэлээр бичсэн, өмнө нь нийтлэгдээгүй, бусдын бүтээлийг хуулбарлаагүй, өөрийн бүтээл байх шаардлагатай. Үгийн тоонд хязгаар тавихгүй.

Захидлын эхэнд эсвэл төгсгөлд оролцогчийн овог, нэр, нас, холбоо барих утасны дугаарыг заавал бичсэн байна.

Шүүгчдийн баг захидлуудыг нэр нууцлан үнэлж, эцсийн шийдвэрийг гаргана.

Шагналын сан 1.000.000 төгрөг бөгөөд шалгарсан захидлыг “Задлаагүй захиа” цахим хуудсанд нийтэлнэ.

Захидал хүлээн авах хугацаа: 2026 оны нэгдүгээр сарын 30-ныг хүртэл ХУД 19-р хорооны Богдын гудамны Тайж группийн 12-р байрны 5 тоотод, мөн И-мэйл хаяг: marketing@somedia.mn хаягаар хүлээн авах юм.