НАМЖИЛДООГИЙН АЛТАНГЭРЭЛ

(1945-2025)

Бидний хайрт багш, сурган хүмүүжүүлэгч, халамжит хань, үр хүүхдийнхээ хайрт аав, буянтай буурал өвөө, найз нөхдийнхөө нөмөр нөөлөг, түшиг тулгуур болсон Н.Алтангэрэл маань 2025 оны 11 дүгээр сарын 14-ний өдөр таалал төгсөж, тэнгэрийн орондоо амар амгалан мориллоо.

Бэсүд овогт Намжилдоогийн Алтангэрэл нь 1945 онд Говь-Алтай аймгийн Чандмань суманд 16 хүү төрүүлсэн өнөр өтгөн гэр бүлийн эцэг Намжилдоо, эх Цэрэнхүү нарын 13 дахь хүү болон мэндэлжээ.

Тэрээр Налайхын 9 дүгээр дунд сургуульд бүрэн дунд боловсрол эзэмшээд Улсын багшийн дунд сургуулийг 1968 онд, Улсын багшийн дээд сургуулийг 1972 онд, Оросын Холбооны Улсын Рязань хотын Хууль зүйн сургуулийг 2006 онд тус тус дүүргэж, 1968 онд Хэнтий аймгийн Мөрөн сумын дунд сургуулийн захирлаас эхлэн боловсролын салбарт 10 гаруй жил ажиллаж байгаад улмаар Боловсролын яамны шийдвэрээр Нийгмийг аюулаас хамгаалах яамны харьяа Засан Хүмүүжүүлэх Байгууллагад 1981 онд тусгай хүмүүжлийн байгууллагын багш, хичээлийн эрхлэгч, захирлаар ажиллаж байгаад 405 дугаар ангийн ашиглалтын өмнөх захиргааны дарга, ахлах нийгмийн ажилтан, сурган хүмүүжүүлэгч багш зэрэг албан тушаалд 2008 оныг хүртэлх хугацаанд тасралтгүй 34 жил ажилласан тэргүүний шилдэг сэхээтэн, сурган хүмүүжүүлэгч багш нарын нэг байлаа. Тэрбээр гэр бүл, үр хүүхдүүдийнхээ хамтаар олон жил энэ байгууллагад сэтгэл зүрхээ зориулан ажилласан манай тэргүүний шилдэг ажилтан байсан тул түүний хөдөлмөр зүтгэлийг төр засагаас өндөрөөр үнэлж ЦЭРГИЙН ГАВЬЯАНЫ УЛААН ТУГЫН ОДОН, АЛТАН ГАДАС ОДОН, БАГШИЙН ГАВЬЯАНЫ ОДОН, АРДЫН БОЛОВСРОЛЫН ТЭРГҮҮНИЙ АЖИЛТАН, ТӨРИЙН АЛБАНЫ ТЭРГҮҮНИЙ АЖИЛТАН, ХУУЛЬ ЗҮЙН ЯАМНЫ ТЭРГҮҮНИЙ АЖИЛТАН, ШШГБ-ЫН ТЭРГҮҮНИЙ АЖИЛТАН, ПРОКУРОРЫН БАЙГУУЛЛАГЫН ТЭРГҮҮНИЙ АЖИЛТАН, АРДЫН ХУВЬСГАЛЫН 50, 60, 70, 80, 90, 100 ЖИЛҮҮДИЙН ОЙН МЕДАЛУУД, ТЭРГҮҮНИЙ БАГШ, ШШГБ-ЫН САЛБАРЫН БОЛОН ОЙН ШАГНАЛУУД, ХҮНДЭТ ТЭМДЭГҮҮДЭЭР шагнаж урамшуулсан нь түүнийг хөдөлмөрч, тууштай төрийн албаны зүтгэлтэн байсны илэрхийлэл юм.

Н.Алтангэрэл нь боловсролын байгууллагууд болон ШШГЕГ-ын харьяа алба, нэгжүүдэд ажиллахдаа өөрийн боловсрол, ажлын арвин туршлагаар олж авсан мэдлэгээ үе үеийн төрийн албаны залгамж халааг бэлтгэх, төрийн албан хаагч нь ёс зүйтэй, хүнлэг энэрэнгүй, зарчимч байхыг үлгэрлэн манлайлсан ахмад ажилтан байсан юм.

Түүний шулуун шударга зан, бусдыг энэрэх чин сэтгэл нь бидний зүрх сэтгэлд үүрд хоногшин үлдэх болно. Хань ижил, үр хүүхэд, ач зээ, төрөл төрөгсөд болон найз нөхөд, шавь нарт гүн эмгэнэл илэрхийлье.

Ум сайн амгалан байх болтугай.