Дундговь аймгийн төрийн байгууллагууд болон сумдын удирдлагуудын оролцоотой аймгийн Засаг даргын шуурхай хурал болж, хурлыг аймгийн Засаг даргын Тамгын газрын фейсбүүк хуудсаар шууд дамжууллаа.  Аймгийн Засаг даргын шуурхай хуралдаанд “Өмнөх шуурхай хуралдаанаар өгөгдсөн үүрэг, даалгаврын биелэлт, ажлын явц, цаг үеийн холбогдолтой ажлын мэдээлэл болон асуудал шийдэл, цахим санал хүсэлтийн хэрэгжилтийн талаар” аймгийн ЗДТГ-ын дарга Б.Лхагвабаатар, “Цаг үеийн холбогдолтой ажлын мэдээлэл, хүн ам орон сууцны тооллогын явцын мэдээллийг” Статистикийн хэлтсийн дарга Б.Энхтуяа, “Төрийн албаны салбар зөвлөлийн талаарх мэдээллийг” ТАСЗ-ийн нарийн бичгийн дарга Э.Одончимэг, “Аймгийн зам тээврийн нөхцөл байдал, хальтиргаа гулгаатай холбоотой гэмтэл, осол, мотоциклийн ослын нөхцөл байдал болон цаашид авч хэрэгжүүлэх арга хэмжээний талаарх мэдээллийг” Тээврийн цагдаагийн тасгийн дарга У.Лхагвабаяр нар тус тус мэдээлэл өглөө.

Хурлаар аймгийн Засаг дарга С.Мөнхчулуун:

- Хөдөө аж ахуйн газар сум болон аймаг дотор оторлохдоо мөрдөх дүрэм, журмыг тодорхойлох,

- Сумдын дарга нар болон багийн дарга нар малчдын өдөр тутам отор хийж буй мэдээллийг нэгдсэн хүснэгтээр бүрдүүлж, мэдээллийг байнга шинэчлэн ажиллах.

- Аймгийн төв болон сумдын төв рүү үхэр мал орж байгаа асуудалд онцгой анхаарах.

- Тээврийн цагдаагийн газар, сумдын Засаг дарга болон холбогдох албаныхан хальтиргаа гулгаатай холбоотой гэмтэл, ослыг бууруулах арга хэмжээ авч, малчид, иргэдэд ухуулан таниулах, сурталчлах, анхааруулах ажлыг зохион байгуулах. Осол, гэмтлийн техникийн нөхцөл байдлыг шалгаж, үзлэг, шалгалтуудыг хийх, мотоциклоос үүссэн эсэх, иргэдийн үйлдлээс болсон эсэхийг дүгнэж, иргэдэд мэдээлэх.

- “Энержи Ресурс” ХХК-аас сумдын айл өрхүүдэд 3500 тонн нүүрс нийлүүлэхээр болсон. Угааж, ариутгасан нүүрс тээвэрлэх болон тараах ажлыг сумдын дарга нар ажлын хэсэгтэй хамтран зохион байгуулах

- Аймгийн төвийн хөнгөлөлттэй нүүрс тараах ажилд хяналт тавьж, уртасгасан цагаар ажиллуулах.

- Зам засвар, арчлалттай холбоотой асуудлыг Цагдаагийн газраас өдөр тутмын нөхцөл байдлын мэдээлэл хүргэх.

- Томилгооны зөрчлүүдийг арилгаж, төрийн албаны сонгон шалгаруулалтыг яаралтай явуулах.

- Мэдээ мэдээллийг үнэн зөв өгөх, зөрүүтэй мэдээлэл гаргасан тохиолдолд мэдээлэл өгсөн хүнд зохих хариуцлагыг тооцох.

- Зөвхөн жижиг, дунд бизнес эрхлэгч гэлтгүй бүх салбарын уялдаа холбоо, менежмент, мэдээлэл, сурталчилгааг холбогдох хэлтсүүд боловсруулж, хэрэгжүүлэх, дэмжиж ажиллахад анхаарах гэсэн үүрэг даалгавар, чиглэлийг өглөө.

Мөн хуралдаанд аймгийн ИТХ-ын дарга Ж.Мөнхчулуун оролцож, салбар агентлаг, байгууллагуудыг ИТХ-ын ээлжит хурлаар хэлэлцүүлэх асуудлуудаа төсвийн тухай хуульд нийцүүлэн ирүүлэх, отор нүүдэлтэй холбоотой мэдээллийг үнэн зөвөөр хүргэх, өвөлжилтийн бэлтгэлтэй холбоотой залилах гэмт хэргийн өсөлттэй холбогдуулан холбогдох байгууллагууд арга хэмжээ авч, иргэдэд мэдээлэл хүргэх чиглэлээр үүрэг, даалгавар өглөө.