Ирэх сарын 15-наас эхлэн “Хотула” аппликэйшнээр сайжруулсан болон хагас коксон түлш авдаг айл өрхүүд угаарын хий мэдрэгчээ унтраасан бол түлш авах боломжгүй болохыг албаныхан мэдээллээ. Энэхүү зохицуулалтаар иргэд угаар мэдрэгчээ асаасны дараа л түлшээ авах нөхцөл бүрдэж байна. Нийслэлийн Агаар, орчны бохирдолтой тэмцэх газрын дарга Д.Мөнхбаатар “Иргэд утаа гараагүй байхад дохиолол дуугарч байна гэж андуурч угаар мэдрэгчээ унтрааж болохгүй. Энэ жилээс алсын зайн хяналттай, батерейгаар ажилладаг ухаалаг угаар мэдрэгчийг нэвтрүүлсэн.

Нийслэлийн хэмжээнд 176 мянган гал түлдэг өрх бүртгэлтэй байна. Үүнээс 131 мянган өрхөд ухаалаг угаар мэдрэгч суурилуулсан.

Түлш хэрэглэгчдэд үйлчлэх төвийн ажилтнууд тухайн айлуудтай холбогдож, шаардлагатай тохиолдолд гэрт нь очиж мэдрэгчийг асаах зөвлөмж өгч байна. Угаарын хий нь амт, өнгө, үнэргүй тул мэдэгдэхгүйгээр хүний эрүүл мэндэд ноцтой нөлөөлдөг. Иймээс иргэд өөрийн мэдрэмжээр бус, угаар мэдрэгчийн дохиололд тулгуурлан аюулгүй байдлаа хангах ёстой. Угаар мэдрэгчээ унтраасан айлд түлш борлуулахгүй байх зохицуулалт хийж байна. Энэ нь айл өрхүүдийг хариуцлагажуулж байгаа нэг хэлбэр юм” гэлээ.

Түлш хэрэглэгчдэд үйлчлэх төв нь айл өрхүүдэд суурилуулсан алсын зайн дамжуулагчтай угаарын хий мэдрэгчийг 24 цагаар хянадаг. Тус төвийн 500 гэрээт ажилтан нийслэлийн 112 хороонд байрлах гэр хорооллын өрхүүдэд үйлчилдэг бөгөөд нэг хороонд дунджаар дөрвөн ажилтан ажиллаж байна. Угаарын аюултай нөхцөл үүссэн айлын мэдээлэл төвийн дэлгэц дээр автоматаар гарч, ажилтнууд холбогдож зөвлөгөө өгдөг байна. Мөн Түлш хэрэглэгчдэд үйлчлэх төвөөс зуух, яндан, пийшинг хөөлөх, засвар үйлчилгээ үзүүлж, гэр хорооллын өрхийн аюулгүй байдлыг хангахад дэмжлэг үзүүлж байгаа аж.