Дотоодын эв нэгдлээрээ гайхуулдаг байсан цаг МАН-д бий. Харин өдгөө хөнжилдөө хөлөө жийлцэн, намын хэрэг бол улсын хэрэг гэдгийг төр, түмэндээ мэдрүүлж байна. Өглөө үдэшгүй хэн нэгнээ харлуулах мэдэгдлийг ар араас нь хийж бужигнасан МАН-ынхан баасан, бямба, нямд ажин түжин байсан ч өнөөдөр өнөө их нам гүмийг эвдэн түжигнэлдлээ. Янз нь МАН-ын маргаант амьдрал Их хурал хүртэл үргэлжлэх төлөвтэй. Энгийчилбэл иргэд үзэх юм ихтэй, сэтгүүлчид бичих юм арвинтай, улстөрчид ярих хов жив элбэгтэйгээр ирэх сарын 15-ныг хүргэх төлөвтэй байна.

Ирэх баасан гарагийн нэгдсэн чуулганаар Хууль зүй дотоод хэргийн сайдаар Б.Энхбаярыг томилох тухай асуудлыг хэлэлцүүлнэ гэх товтой зэрэгцэн, УИХ-ын гишүүн П.Сайнзориг УИХ-ын гишүүнийхээ албан бланк дээр  Засгийн газрыг огцруулахаар гарын үсэг цуглуулж эхэллээ. Засгийн газрыг унагаах ажлыг зохион байгуулсны цаадтай бас ч гэж дажгүй “хэрчим “хүртэхээр тохиролцсон гэх сураг ч бас байна.

Тодруулбал, барагтай л бол хөл алдаж, хөнгөндөж гүйдэггүй П.Сайнзориг гишүүнийг Хуульзүй, дотоод хэргийн сайдын суудал ийн хөдөлгөөнд оруулсан гэж учир мэдэх улс барин тавин ярилцаж байна.

Яг одоогоор хэдэн гишүүн гарын үсэг зурсан нь тодорхойгүй ч АН-ынхан азнасан байдалтай байгаа гэх мэдээлэл бий. Хэрвээ Г.Занданшатарын Засгийн газрыг огцруулах бичиг өргөн баригдвал хуулиараа гурав хоногийн дараа хэлэлцэх учиртай. Өөрөөр хэлбэл ирэх пүрэв гарагт чуулганаар хэлэлцэж, 65 гишүүн дэмжвэл унаж таарах байх.

Мэдээж Г.Занданшатарын бүлэглэлийн зүгээс УИХ-ын даргыг огцруулах акц эхэлнэ. Гэхдээ УИХ-ын даргыг авч хаях хууль босго өндөртэй.  Санаан зоргоор болох нь юу л бол гэж улс төр судлаачид хэлж буй.  Ямартай ч унаагүй засгийг унагаж, улс төрийн ашиг хонжоо хайгсад цөм хөдөлгөөнд орсон нь лавтай магадтай хэрэг болчихоод байна.