НҮБ-ын дэргэдэх Дэлхийн аялал жуулчлалын байгууллагаас санаачлан жил бүрийн есдүгээр сарын 27-ны өдрийг Дэлхийн аялал жуулчлалын өдөр болгон тодорхой уриан дор тэмдэглэж ирсэн.  Тус өдрийг дэлхийн улс орнууд энэ жил "Аялал жуулчлал ба тогтвортой шилжилт" уриан дор тэмдэглэн өнгөрүүлж байна. Дэлхийн аялал жуулчлалын өдрийг тохиолдуулан Монголын аялал жуулчлалын холбоо, Нийслэлийн аялал жуулчлалын газар хамтран "Outbound travel mart 2025" гадаад аяллын өдөрлөгийг энэ сарын 26-нд төв талбайд зохион байгууллаа. “Хариуцлагатай монгол аялагч-Гадаадад хэрэгжүүлцгээе” уриан дор зохион байгуулсан өдөрлөгийн хүрээнд аяллын цогц мэдээ мэдээлэл, зөвлөгөөг нэг дороос авах боломжийг иргэдэд олгосон аж.

Испани улсад анх 1979 онд болсон Дэлхийн аялал жуулчлалын байгууллагын Ерөнхий ассамблейн III чуулганаас энэ өдрийг Дэлхийн аялал жуулчлалын өдөр хэмээн зарлаж байв. НҮБ-ын дэргэдэх Дэлхийн аялал жуулчлалын байгууллагын гишүүн 154 орон 1980 оноос, харин Монгол Улс 1990 онд ДАЖБ-ын гишүүн болж, 2007 оноос хойш жил бүр тэмдэглэж байна. 

Дэлхийн аялал жуулчлалын өдөр нь аялал жуулчлалын салбарын үнэ цэн, нийгэм, эдийн засаг, соёл, байгаль орчин, улс орнуудын хамтын ажиллагаа, найрамдлыг бэхжүүлэхэд оруулж буй хувь нэмрийг хамтдаа тэмдэглэн хүндэтгэх чухал өдөрт тооцогддог.