Хүн худалдаалахтай тэмцэх тухай хуулийг даган гарсан шинэ журам болон шинэчлэн найруулан батлуулсан журмыг танилцуулах, нийгмийн хамгааллын алба хаагч, мэргэжилтнүүдийн ур чадварыг дээшлүүлэх сургалт боллоо. Тодруулбал, Гэр бүл, хөдөлмөр, нийгмийн хамгааллын яам нь “Хүн худалдаалахтай тэмцэх тухай” хуулийн хэрэгжилтийг хангах ажлын хүрээнд БНСУ-ын Жендэрийн тэгш эрхийн яамны дэмжлэгтэйгээр Хүйсийн тэгш Эрх Төв ТББ хамтран “Эмэгтэйчүүдийн эсрэг хүчирхийллээс урьдчилан сэргийлэх, бэлгийн мөлжлөгийн хохирогчид туслалцаа үзүүлэх” төслийг 2019-2023 онд хэрэгжүүлсэн.  Төслийн хүрээнд хэрэгжүүлсэн томоохон үйл ажиллагааны нэг нь “Хүн худалдаалах гэмт хэргийн хохирогчийг таних, тогтоох заавар”-ыг, гарын авлагын хамт боловсруулж, Хөдөлмөр, Нийгмийн Хамгааллын яамны сайдын 2022 оны 04 дүгээр сарын 05-ны дугаар А/57 тушаалаар батлуулж, МУ-ын нутаг дэвсгэрт мөрдөж, хэрэгжүүлэх боломжийг бүрдүүлсэн юм.

Монгол Улс болон АНУ хоорондын Хүүхэд хамгааллын түншлэлийн компакт гэрээний хүрээнд “Хүн худалдаалахаас хүүхдийг хамгаалах нь” төслийг хэрэгжүүлж байгаа билээ. Тус төслийн хүрээнд Хүн худалдаалахтай тэмцэх тухай хуулийг даган гарах 4 шинэ журмыг батлуулсан ба батлагдан гарсан 3 журмыг шинэчлэн найруулж, батлуулах ажил хийгдсэн. Тухайлбал:

Гэр бүл, хөдөлмөр, нийгмийн хамгааллын сайдын 2024 оны 10-р сарын 18-ны өдрийн А/40 тушаалын хавсралт “Хохирогчийг ажлын байраар хангах, мэргэжлийн сургалтад хамруулах үйлчилгээ үзүүлэх” журам

Гадаад харилцааны сайдын 2024 оны 11-р сарын 12-ны өдрийн А/71 тушаалын хавсралт “Хүн худалдаалах гэмт хэргийн хохирогчид үйлчилгээ үзүүлэх” журам

Хууль зүй, дотоод хэргийн сайдын 2023 оны 11-р сарын 20-ний өдрийн А/399 тушаалын хавсралт “Хүн худалдаалах гэмт хэргийн хохирогчдод хууль зүйн туслалцаа үзүүлэх” журам

Монгол Улсын Засгийн газрын 2024 оны 12-р сарын 18-ны өдрийн 215 дугаар тогтоолын хавсралт “Хүн худалдаалах гэмт хэргийн хохирогчийг хамгаалах байрны бүтэц, зохион байгуулалт, ажиллах” журмыг баталж хэрэгжүүлэхээр ажиллаж байна.