Бага насны хүүхэд ор сураггүй алга болсон гэх дуудлага өчигдөр өдрийн 16 цаг 55 минутад Хөвсгөл аймгийн Онцгой байдлын тусгай дугаарын утсанд ирсний дагуу эрэлийн ажиллагаа гурав дахь өдрөө үргэлжилж байна. Тодруулбал, иргэн "Ц" гэр бүлийн хүнийхээ хамт Хөвсгөл аймгийн Тариалан сумаас  хойд зүгт 30 км зайд мод бэлтгэлийн ажил хийхээр явахдаа хоёр настай хүүхдээ авч явжээ. Эцэг эхийгээ түр холдох үед авто машинд унтаж байсан хүү ор сураггүй алга болсон байна. 

Эрлийн ажиллагаа 2 өнөөдөр буюу гурав дахь өдрөө үргэлжилж байгаа бөгөөд одоогийн байдлаар Тариалан  сумын Засаг даргын орлогчоор ахлуулсан орон нутгийн 250 гаруй иргэн, төрийн албан хаагч, 38 автомашин, 2 мотоцикл, 4 морьтойгоор 4-5 км-ийн радиуст самналт хийжээ. 

Харин өнөөдрийн байдлаар ОБЕГ-ын дэргэдэх 111 дүгээр анги, Хөвсгөл аймгийн Онцгой байдлын газар, Булган аймгийн Онцгой байдлын газрын Хутаг-Өндөр сум дахь Эрэн хайх аврах, салбар, Цагдаагийн газрын Тариалан сумын сум дундын хэсэг, Тариалан сумын Засаг даргын орлогчоор ахлуулсан мэргэжлийн анги, аймгийн ЗДТГ, Хилийн цэргийн 0257 дугаар анги, Зэвсэгт хүчний 321 дүгээр тусгай салбар, Шүүхийн шийдвэр гүйцэтгэх газрын алба хаагчид, Хүүхэд, гэр бүлийн хөгжил, хамгааллын газрын ажилтнууд, ар гэрийнхэн, нутгийн иргэд нийт 200 гаруй хүн, нисдэг тэрэг, дрон, эрэлч нохойтойгоор эрэн хайх ажиллагааг явуулж байна.