Монгол Улсын Ерөнхийлөгч У.Хүрэлсүхийн урилгаар Бүгд Найрамдах Австри Улсын Ерөнхийлөгч Александр Ван дер Беллэн Монгол Улсад 2025 оны 05 дугаар сард төрийн айлчлал хийсэн. Энэхүү айлчлалын үеэр "Нийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээр”-т Бүгд Найрамдах Австри Улсын Европ, олон улсын харилцааны яамны Ерөнхий нарийн бичгийн дарга болон Гэр бүл, хөдөлмөр, нийгмийн хамгааллын сайд нар гарын үсэг зурсан.

Тус хэлэлцээрийг хэрэгжүүлэх удирдлагын тохиролцоог Монгол Улсын талаас Гэр бүл, хөдөлмөр, нийгмийн хамгааллын сайд Т.Аубакир, Бүгд Найрамдах Австри улсын талаас Хөдөлмөр, нийгмийн хэрэг, эрүүл мэнд, асрахуй, хэрэглэгчийг хамгаалах сайд Коринна Шуман нар 2025 оны 09 дүгээр сарын 16-ны өдөр гарын үсэг зурж баталсан. Улмаар энэхүү батлагдсан удирдлагын тохиролцоог албан ёсоор солилцох арга хэмжээ 2025 оны 09 дүгээр сарын 17-ны өдөр Бүгд Найрамдах Австри Улсад боллоо.

Энэхүү арга хэмжээнд Монгол Улсаас Австри Улсад суугаа Онц бөгөөд бүрэн эрхт Элчин сайд М.Цэнгэг, Австри Улсын Хөдөлмөр, нийгмийн хэрэг, эрүүл мэнд, асрахуй, хэрэглэгчийг хамгаалах яамны газрын дарга Манфред Полтл нар оролцлоо. Энэхүү хэлэлцээр хэрэгжсэнээр иргэд нийгмийн даатгалын шимтгэлийг хоёр улсад давхар төлөхөөс чөлөөлөгдөх, хоёр улсад ажиллаж, даатгалын шимтгэл төлсөн хугацаагаа өөрийн улсдаа шимтгэл төлснөөр нэгтгэн тооцуулж, өндөр насны, хөдөлмөрийн чадвар алдсаны, тэжээгчээ алдсаны тэтгэвэр авах эрх зүйн үндэс бүрдэж, нийгмийн хамгааллын баталгаа нь сайжрах ач холбогдолтой.

2024 оны байдлаар Бүгд Найрамдах Австри Улсад Монгол Улсын 2,800 иргэн оршин сууж байгаагаас 1,696 иргэн ажил хөдөлмөр эрхэлж байгаа бол Монгол Улсад 100 орчим Австри Улсын иргэн оршин сууж байна.

Монгол Улсын Засгийн газраас гадаад улсад ажиллаж, амьдарч буй Монгол иргэдийн нийгмийн баталгааг хангах зорилгоор тодорхой арга хэмжээнүүдийг авч хэрэгжүүлж ирсний нэг нь Монгол Улсын иргэд олноор оршин суудаг улс орнуудтай нийгмийн хамгааллын хэлэлцээрийг байгуулж, хоёр улсын иргэдийн нийгмийн харилцаанд харилцан тэгш эрхтэй байх, тухайн улсын иргэний нэгэн адилаар тэтгэвэр, тэтгэмж авах хууль эрх зүйн үндсийг бүрдүүлэх ажил юм.