"Gem mall" худалдааны төвд 2025 оны зургадугаар сарын 27-нд эхнэрээ олон удаа хутгалж, хөнөөсөн иргэний шүүх хурал өнөөдөр /2025.09.17/ болж байна. Тодруулбал, нийслэлийн Баянгол дүүргийн нутаг дэвсгэрт байрлах "Gem mall" худалдааны төвд лангуу түрээслэгч эмэгтэйг нөхөр болох иргэн Э хувийн таарамжгүй харилцааны улмаас олон удаа хутгалж амийг нь хөнөөсөн хэрэг гарсан билээ. Энэ хэрэгт прокуророос яллах дүгнэлт үйлдэж, хэргийг шүүхэд шилжүүлсэн байдаг.

Хэрэгт сэжиглэгдэж буй этгээдийн үйлдлийг Эрүүгийн хуулийн 10.1 дүгээр зүйл “Хүнийг алах”-ийн 2.1 “онц харгис хэрцгийгээр”, 2.8 “гэр бүлийн хүчирхийлэл үйлдэж”-д зааснаар эрүүгийн хэрэг үүсгэн шалгаж, хэргийг шүүхэд шилжүүлэх саналтай нийслэлийн прокурорын газарт шилжүүлээд байсан юм.

Тэгвэл прокуророос тус хэрэгт яллах дүгнэлт үйлдэж хэргийг шүүхэд шилжүүлж хэргийн шүүх хурал Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд /2025.09.09/ болох ёстой байсан ч шүүх хуралд иргэдийн төлөөлөл байгаагүй учир энэ сарын 17-ны 9.00 цаг хүртэл хойшлуулаад байсан юм. Хэрэгтэн Э-гийн өмгөөлөгч шүүх хуралдааныг хаалттай явуулах хүсэлт гаргалаа. Прокурорын зүгээс шүүх хуралдаанаар эмзэг мэдээлэл бүхий нотлох баримтыг шинжлэх учраас хаалттай явуулах саналыг дэмжлээ.