Сонгуулийн ерөнхий хороо сонгогчдод сонгуулийн боловсрол олгох, сонгуулийн эрх зүйг хөгжүүлэх чиглэлээр Монгол Улсын Үндэсний номын сан /National Library of Mongolia/-тай хамтран ажиллахаар Санамж бичиг байгуулсан. Тодруулбал, сонгуулийн эрх зүй, сонгуулийн процессын эрх зүйн салбарын эрдэм шинжилгээ, судалгааны бүтээлийг нэмэгдүүлэх, мэргэшсэн судлаач бэлтгэх нөхцөл бүрдүүлэх, энэ чиглэлээрх эрдэм шинжилгээ, судалгааны бүтээлийг судалгаа, шинжилгээний эргэлтэд оруулах, судлаачдыг идэвхжүүлэх зорилгоор хоёр байгууллага хамтран ажиллаж байгаа юм.

Түүнчлэн сонгуулийн хууль тогтоомж, эрх зүйн баримт бичгийг нийтэд тайлбарлан таниулах, сонгогчдод сонгуулийн болон эрх зүйн боловсрол олгох чиглэлээр олон талт үйл ажиллагааг хамтран хэрэгжүүлэх аж.

Хамтын ажиллагааны хүрээнд сонгуулийн хууль тогтоомж, эрх зүйн баримт бичиг, судалгааны бүтээл, лекц, хурал, хэлэлцүүлгийн видео бичлэгийг нийтэд тайлбарлан таниулах, сурталчлах бүтээлийн сан үүсгэж, Үндэсний номын сан Сонгуулийн боловсрол, эрх зүйн уншлагын танхимтай болох юм. Мөн их, дээд сургуулиудын багш, оюутан, судлаачдад чиглэсэн олон талт арга хэмжээг хэрэгжүүлэхээр тохиролцсон байна. Хамтын ажиллагааны Санамж бичигт Сонгуулийн ерөнхий хорооны Тамгын газрын дарга Д.Бат-Эрдэнэ, Монгол Улсын Үндэсний номын сангийн захирал Б.Ичинхорлоо нар өнгөрсөн наймдугаар сарын 25-н гарын үсэг зурсан билээ.