Нэр бүхий улс төрч, бизнес эрхлэгчдийн хүүхдүүд хоорондоо маргалдаж, улмаар нэгнийхээ биед халдсан хэрэг гарсан.  Тодруулбал, Ц.Санжаачойпэл, Э.Тэмүүлэн, Б.Амарсайхан, Л.Алтан-Очир нарт зодуулсан гэх иргэн Д.С-ийг гадаад руу эмчилгээнд яваад ирсэн бөгөөд маргааш дахин явах юм байна. Тэдэнд зодуулсан хохирогч залуугийн аав Д.Дашзэвэг  Хялбар ажиллагааны шүүхийн гадаа сэтгүүлчдийн асуултад хариулт өглөө.  

-Таны хүүг хөнгөн гэмтсэн, эрүүл мэнд нь сайжраад ирсэн гэж яллагдагч талынхны ар гэрийнхэн цахим хуудаснаа бичсэн байна. Хүүгийн тань бие ямар байна вэ?
-Хүү минь эрүүл саруул болох ямар ч боломжгүй болсон. Нүүрний цөмөрсөн ясыг тэгшлэх, нааш нь татаж гаргах мэс засалд орсон. Мэс заслын дараа хэсэг завсар гарахад нь гэртээ ирж амраад, удахгүй Солонгос руу эмчилгээндээ явах гэж байна. 

Миний хүүг бусдын биед хөнгөн гэмтэл учруулсан гэж яллагдагчаар татаж, хилийн хориг тавих шийдвэр прокуророос гаргасан. Прокурорын хүсэлтийг шүүх арай дэмжихгүй байх гэж итгэж байна.

-Хүү тань одоо ямар байдалтай байна вэ?
-Миний хүү сэтгэлзүйн хувьд маш хүнд байгаа. Бусад залуусын адил сургууль төгсөөд ирсэн. Мэргэжлээрээ ажиллахын өмнө ийм байдал боллоо. Эрүүл мэндийн байдалд цаашид ямар хүндрэл учрахыг хэлж мэдэхгүй.

Ямартай ч  Сүхбаатар дүүргийн прокурорын газраас Д.С-ыг мөн хүний биед хөнгөн хохирол учруулсан гэх үндэслэлээр Эрүүгийн хуулийн 11.6-д зааснаар (хүний эрүүл мэндэд хөнгөн хохирол санаатай учруулах) яллагдагчаар татан шалгаж эхэлсэн байна. Улмаар прокурорын газраас түүнд Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авах саналыг Дүүргийн эрүү, иргэний хялбар ажиллагааны анхан шатны тойргийн шүүхэд энэ сарын 9-ний өдөр хүргүүлжээ.

Саналыг өнөөдөр (2025.09.10) тус шүүхэд хэлэлцэв. Шүүгч прокуророос гаргасан хилээр гарахыг хориглох тухай саналыг үндэслэлгүй гэж үзэн хүлээн авахаас татгалзаж шийдвэрлэжээ. Өөрөөр хэлбэл яллагдагч Д.С-д Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ зайлшгүй авах шаардлагагүй гэж үзсэн байна.