Монгол Улсад Өмгөөлөгчдийн байгууллага үүсэж хөгжсөний 97 жилийн ойг тохиолдуулан Монголын Өмгөөлөгчдийн Холбоо, Нийслэлийн Засаг даргын тамгын газар, Монгол Улсад гэмт хэргээс урьдчилан сэргийлэх ажлыг зохицуулах зөвлөлтэй хамтран холбооны гишүүн өмгөөлөгчдийн сайн дурын оролцоо, идэвх санаачилгад тулгуурлан нийгмийн хариуцлагын хүрээнд иргэдийн эрх, хууль ёсны ашиг сонирхлыг хамгаалах, хууль зүйн туслалцаа үзүүлэх, иргэдийн эрх зүйн боловсролыг дэмжих зорилгоор хууль зүйн үнэ төлбөргүй зөвлөгөө өгдөг уламжлал бий. Тодруулбал, “Өмгөөлөгч -Танд тусалъя-2025” өдөрлөгийг 09-р сарын 03-ны өдөр Жанжин Д.Сүхбаатарын талбайд амжилттай зохион байгууллаа.

Тус өдөрлөгт бүхий л салбар эрх зүйн чиглэлээр мэргэшсэн 50 гаруй өмгөөлөгчид, 15 гаруй хуулийн этгээд оролцож, 450 гаруй иргэдэд хууль зүйн зөвлөгөөг үнэ төлбөргүй өгч, тулгамдсан асуудлуудыг нь шийдвэрлэхэд дэмжлэг үзүүлэв.

Мөн Хууль зүйн туслалцааны төв, Монголын Олон Улсын Арбитр, Монголын Нотариатчидын танхим, Хууль зүйн үндэсний хүрээлэн, Шүүхийн шийдвэр гүйцэтгэх ерөнхий газар, Цагдаагийн ерөнхий газар, Авлигатай тэмцэх газар, Монгол Улсын Хүний эрхийн Үндэсний Комисс, Шүүхийн ерөнхий зөвлөл, Улсын бүртгэлийн ерөнхий газар, Нийгмийн даатгалын ерөнхий газар, Дүүргийн Эрүү, Иргэний хялбар ажиллагааны анхан шатны тойргийн шүүх, Хүүхэд, гэр бүлийн хөгжил, хамгааллын ерөнхий газар зэрэг байгууллагууд иргэдэд төрийн үйлчилгээг үзүүлж, хууль зүйн туслалцаа, төрийн үйлчилгээг нэг дор авах боломж бүрдсэнээрээ үр дүнтэй, ач холбогдолтой арга хэмжээ болж өнгөрлөө. 

Энэ ташрамд дэлхийн улс орнуудын өмгөөлөгчтэй холбоотой сонирхолтой баримтуудыг сонирхуулахаар бэлтгэлээ.

• Израйль улсын Барын холбоонд 2015 оны 8 сарын байдлаар 73,726 хуульчид бүртгэлтэй харин хүн ам нь 8,296,000 хүн амтай. (2014 оны сүүлийн байдлаар) Үүнээс харахад 112 хүн тутамд нэг өмгөөлөгч ногдож байгаа нь дэлхийд нэгдүгээрт орох үзүүлэлт юм байна.
• АНУ 2015 оны байдлаар 1,300,705 хуульчид үйл ажиллагаа явуулж байгаа ба 1 хуульчид 240,5 хүн ногдож байгаагаар дэлхийд тэргүүлж байна. Үүнээс Нью-иорк муж улс хамгийн их буюу 172,630 хуульчидтай бөгөөд 114 хүн тутам 1 өмгөөлөгч ногддог байна.
• Хамгийн цөөхөн хуульчидтай муж улс нь Американ Самоа хэмээх муж улс бөгөөд энд 57,633 хүн амьдардагаас 102 нь өмгөөлөгч ажээ.
• .Энэтхэг улс 1,3 сая хуульчидтайгаараа дэлхийд тэргүүлдэг боловч 974 хүн тутамд нэг өмгөөлөгч ногдон ажилладаг байна.
• Харин манай хөрш ОХУ-д 2023 оны байдлаар 72,647 хуульчидтай ба нийт хүн ам нь 143,975,923 бөгөөд 1982 хүн тутас 1 хуульч өмгөөлөгч ногдож байгаа нь нэлээд өндөрт орох статистик юм.