2025 оны наймдугаар сарын 25–31-ний өдрүүдэд БНХАУ-ын ӨМӨЗО-ы Хөх хотод зохион байгуулагдах тав дахь удаагийн “Монгол-Хятадын Экспо”-д Дундговь аймгийн 13 аж ахуйн нэгжийн төлөөлөл, нийт 15 хүний бүрэлдэхүүнтэй баг оролцохоор хөдөллжээ. Энэ удаагийн экспод тус аймгийн аж ахуйн нэгжүүдийн төлөөлөгчид буюу спорт хувцас үйлдвэрлэгчид, монгол үндэсний хувцас урлаачид, арьс ширэн болон суран эдлэлийн бизнес эрхлэгчид, алт, мөнгөний уран дархчууд гэх мэт өргөн хүрээний салбарыг хамарч, өөрсдийн бүтээгдэхүүнээ олон улсын зах зээлд сурталчлан таниулах, шинэ хэрэглэгч, түнш олох боломжийг эрэлхийлж байгаа юм. 

Аймгийн Засаг дарга С.Мөнхчулуун ААН төлөөллүүдэд олон улсын үзэсгэлэнгээс шинэ туршлага олж ирэхийн зэрэгцээ аймгийн хөгжилд хэрэгжүүлэх санаагаа бусадтайгаа хуваалцахыг хүссэн байна. Тодруулбал, олон улсын үзэсгэлэнгээс шинэ мэдлэг, технологи, туршлага судлах, аймгийн онцлогт тохирсон шинэ санаа, соргог ажлуудыг нутагтаа хэрэгжүүлэх, харилцан итгэлцэл дээр суурилсан хамтын ажиллагааг өргөжүүлэх, ирээдүйд Дундговийн үйлдвэрлэгчдэд гадаад зах зээлд гарах гарц нээх боломжийг судлахыг хүссэн аж. Мөн эргэн ирээд аймгийнхаа бусад бизнес эрхлэгчидтэй олж мэдсэн туршлага, санаа оноогоо харамгүй хуваалцаж, хамтын хөгжилд хувь нэмрээ оруулахыг уриалжээ.

“Монгол-Хятадын Экспо” нь 2015 оноос эхлэн хоёр жил тутам зохион байгуулагдаж ирсэн бөгөөд хөрөнгө оруулалтын форум, худалдааны хэлэлцээр, хүмүүнлэгийн солилцоо болон бараа бүтээгдэхүүний үзэсгэлэн худалдаа гэсэн үндсэн дөрвөн хэсгээс бүрддэг. Тус арга хэмжээ нь Монголын үндэсний үйлдвэрлэгчдэд Хятадын зах зээлд нэвтрэх бодит гарц, хамгийн боломжит зардал, өндөр үр дүнтэй оролцоог бий болгодгоороо онцлог билээ.  Дундговь аймгийн бизнес эрхлэгчдийн энэхүү оролцоо нь зөвхөн өөрийн байгууллагаа таниулах бус, аймаг, улсаа сурталчлах, олон улсын түвшинд хамтын ажиллагааг өргөжүүлэх чухал алхам болж байгааг оролцогсод онцолж байлаа.