Эрүүл мэндийн сайд Ж.Чинбүрэн мэдээлэл хийлээ.Тодруулбал, СЭМҮТ-ийн төлбөртэй тусламж, үйлчилгээний талаар иргэнээс АТГ-т гомдол ирүүлснийг шалгуулахаар ЭМЯ-нд шилжүүлсний дагуу ЭМЯ-ны хяналт, шинжилгээ, үнэлгээ, дотоод аудитын газраас санхүүгийн хяналт шалгалт хийсэн. Шалгалтаар гэмт хэргийн шинжтэй нөхцөл байдал тогтоогдсон тулд ЦЕГ-тай хамтарсан шалгалтыг 2025 оны хоёрдугаар сарын 25-наас гуравдугаар сарын 24-нийг хүртэл хийсэн. Хяналт шалгалтаар дараах зөрчлүүд илэрсэн. Тухайлбал,

Төлбөртэй тусламж үйлчилгээ авсан иргэнд төлбөр төлсөн баримт өгдөггүй. Үйлчлүүлэгч эрүүл мэндийн байгууллагын данснаас өөр дансанд төлбөр төлөхийг хориглосон журмыг удаа дараа зөрчсөн. 2022-2024 онд цахим бүртгэлд бүртгэлд бүртгэгдсэн төлбөртэй тусламж үйлчилгээний орлого болох 527.8 сая төгрөгийн ор хоногийн төлбөрийг иргэдийг цагтаа ирээгүй, өөрөөр хэлбэл эмнэлэгт хэвтээгүй гэж цуцалсан.

Өөрөөр хэлбэл иргэд эмнэлэгт хэвтэж, орны төлбөр төлсөн байхад хэвтээгүй хэмээн бүртгэлийг цуцалсан. Цагтаа ирээгүй гэх мэт шалтгаанаар хэвтээгүй хэмээн бүртгэж, иргэдийн төлсөн төлбөрийг 24 цагийн дотор эмнэлгийн данснаас гаргаж авдаг зөрчил илэрсэн. Энэ замаар 478.9 сая төгрөгийг цуцлалт хийж, СЭМҮТ-ийн дарга нар ажилтнуудтайгаа хуйвалдан бэлнээр болон хувийн данс руу шилжүүлж авдаг нь тогтоогдож, одоо эрүүгийн хэрэг үүсгэн шалгаж байна. Энэ нь таваас дээш жил үргэлжилж, байгууллагын хэвийн үйл ажиллагаа, иргэдэд үзүүлэх тусламж үйлчилгээний чанарт сөргөөр нөлөөлж, үнэнчээр зүтгэж буй эмч, ажилчдын сэтгэл зүрхийг мохоож, ажлын байраа орхих хэмжээнд хүргэж байна" гэлээ. 

Мөн энэ оны зургадугаар сарын 30-нд болон долдугаар сарын 4-ний өдөр нэр бүхий иргэд эрүүл мэндийн сайдад болон АТГ-т хандан СЭМҮТ-ийн удирдлагын үйл ажиллагаа, хүний нөөцийн бодлого, сонгон шалгаруулалт эмнэлгийн тусламж үйлчилгээ болон “Эрүүл монгол хүн хөтөлбөр”-ийн хэрэгжилттэй холбоотой гомдол ирүүлжээ. Асуудлыг АТГ-аас ЭМЯ-нд шалгуулахаар шилжүүлсний дагуу долдугаар сарын 8-25-ны өдрүүдэд хянан шалгах ажлыг зохион байгуулсан банйа. Хяналт шалгалтаар, “Эрүүл Монгол хүн хөтөлбөр”-ийн хэрэгжилттэй холбоотой зөрчил илэрчээ.

Тухайлбал “Эрүүл монгол хүн” арга хэмжээг хэрэгжүүлэхээр 1,3 тэрбум төгрөгийн санхүүжилтийн эрх СЭМҮТ-д энэ оны дөрөвдүгээр сарын 4-ний өдрөөс шилжүүлжээ. Гэвч арга хэмжээний нарийвчилсан төлөвлөгөө болон үйл ажиллагааны удирдамж, төсвийн задаргаа зэргийг тус бүрээр батлаагүй. “Эрүүл монгол хүн” хөтөлбөрийг хэрэгжүүлэх хүний нөөцийн сонгон шалгаруулалт хийхгүйгээр Сэтгэц нийгмийн сэргээн засах төвийн ажилтан гэх 14 иргэнтэй СЭМҮТ-ийн захирал нь хөлсөөр ажиллах гэрээ байгуулсан байсан аж. Тэдгээр гэрээт 14 ажилчдын тав нь л сэтгэцийн эмч, сувилагч, сэтгэл судлаач зэрэг мэргэжилтэй. Бусад нь зам гүүрийн техникч, барилгын инженер, орчуулагч зэрэг мэргэжлийн шаардлага хангаагүй хүмүүс байжээ.

Гэрээт 14 иргэний арван хүнтэй нь санхүүжилтийн эрх шилжүүлсэн тушаал гарахаас өмнө гэрээ байгуулж нэгээс гуравдугаар сарын цалинд 70,7 сая төгрөг олгосон байна.

Мөн санхүүжилтийн эрх шилжүүлсэн тушаал хүчингүй болсон энэ оны зургадугаар сарын 12-ноос хойш нийт 248 сая төгрөгийн 40 гүйлгээ гаргасан байна. Гэтэл эрүүл мэндийн сайдын тушаалаар баталсан бүсэд сэтгэц нийгмийн сэргээн засах төв гэж нэгж байхгүй. Энэ нь улсын бүртгэлтэй ААН байгууллага хуулийн этгээд биш гэдэг нь тогтоогдсон. Сэтгэц нийгмийн сэргээн засах төвийн үйл ажиллагаа явуулахад зориулж ажлын байр түрээслэх 82,5 сая төгрөгийн худалдан авах ажиллагааг энэ оны зургадугаар сараас долдугаар сард гурван удаа хийсэн. Түүнчлэн, тендер шалгаруулалтаас өмнө буюу тавдугаар сард иргэн З-тэй үл хөдлөх хөрөнгө түрээслэх тухай гэрээ хийсэн байна. Гэрээг төлөөлж СЭМҮТ-ийн хуулийн зөвлөх, хүний нөөцийн ажилтан О гэгч иргэн байгуулсан боловч тус төвд ийм ажилтан байхгүй байжээ. 

Түүнчлэн зарим удирдах албан хаагчдыг сонгон шалгаруулалтгүйгээр томилжээ. Мөн Удирдлагын зөвлөлийн гишүүдэд ур чадварын нэмэгдэл гэх 24,9 сая төгрөгийн хууль бус нэмэгдлийг энэ оны эхний хагас жилийн байдлаар олгосон нь илэрчээ. Энэ нь “Хэмнэлтийн тухай хууль”-ийг зөрчсөн төдийгүй  шаардлага хангаагүй олон зөвлөх ажиллуулснаар цалингийн зардалд мөн энэ оны эхний хагас жилийн байдлаар 22,4 сая төгрөг зарцуулсан байсан юм байна.