МАН-ын Олон нийттэй харилцах, зохион байгуулалтын газрын дарга  Ж.Дамдинцэрэн нэгэн цагт Нийслэлийн Соёл урлагийн газрын даргаар ажиллаж байсан. Тэрбээр албаа одоогийн дарга Э.Цэнд-Аюушыг түр орлон гүйцэтгэгчээр томилогдоход нь хүлээлгэн өгч, хадаг сүү барин тамга тэмдгээ өгчилгөж байсан нь түүхэн баримт. Тэр ч утгаараа залуу хүний замын хүзүү урт гэдэгчлэн эвтэй найртай нөхөрлөл үүсгэн энэ цагийг хүрсэн нь бас маргашгүй асуудал. Гэвч МАН-ын залуусын нөхөрлөл өндөрлөсөн бололтой.

Тодруулбал, Төрийн соёрхолт, Хөдөлмөрийн баатар, Монгол Улсын Ардын жүжигчин, хөгжмийн зохиолч Н.Жанцанноровын хүү төгөлдөр хуурч, хөгжимчин Ж.Дамдинцэрэн бээр нүүр номоороо дамжуулан, “За нэг нөхрийг /Э.Цэнд-Аюуш/ жинхнээсээ өөрөө оролцож байж зайлуулахгүй бол сүүлдээ өөрийнхөө хийсэн хэргийг над руу чихэх нь... Шорон оронд явчихвал төвөг гээд уужуу зан гаргаад байсан юм. Хүүхдүүдийг нь бодсон юм даа, зайлуул! Одоо битгий давраад байгаарай л гэж хэлье!!!  

Юм ойлгохгүй, дээр нь хийсэн жанхуугаа дуугүй гудраад байж чадахгүй эргүүтээд байгаа бол өдий болтол хууль хүчний холбогдох газруудад өгөөгүй байсан бүх юмаа өөрөө аваачиж өгье. Хэвлэл мэдээллийнхэнд ч баримттай яг юу болсон, үзүүлээд байгаа баримт нь яг ямар учиртай, ямар аалзны тор хийж хажуудах найз нөхдөө хорлож, ашиглаж, хэнтэй үгсэн хуйвалдаж яаж залилан, мөнгө угаах гэмт хэрэг хийснийг нь үзүүлээд, зарлаад өгье!

Хүмүүс сонсоод тэнэг биш бол ойлгох биз ээ. Анхан болон давж заалдах шатанд гэм буруутай гээд тогтоочихсон, одоо дээд шат нь болох гэж байгаа биз. Дээд шатны шүүх дээр чинь би өөрийн биеэр гэрчээр орох хүсэлт гаргаж байгаад очиж чамаас ял асууя. Эргүү дагз вэ яах вэ гээд байхад!!!  Хэдэн зуун сая төгрөг Төрийн мөнгөнөөс идчихээд 6 саяар торгуулаад зүгээр өнгөрнө гэж байхгүй шүү!!!

Дээр нь Увертюра хамтлагтай Европоор аялан тоглолтоор нь дагаж далбаганаж явахдаа нэг гадаад эмэгтэйд хүч хэрэглэж юу юу болсныг чинь мэдээд л байгаа! Амьд гэрч нь тэр улсаас чинь ирчихсэн Монголд амьдарч байгаа эмэгтэй бий шүү!!!

Яаж өдий болтол албан тушаал хашаад, хэний хойноос хутга зоогоод, хэнтэй нийлж сүүлийн хэдэн жил Соёл, урлагийн салбарыг маань самарч, мөнгө угааж, хутган завааруулж байгааг чинь өөрийн биеэр эцсийн хүртэл зарлаж, ялыг чинь асуухаас өөр зам үлдээхгүй бололтой!!! Удахгүй уулзъя! Энхтайван Цэнд-Аюуш” хэмээн нийтэлжээ.

Эргэн сануулахад, Анхан шатны шүүхээс 6 сая төгрөгийн торгох ял болон нийтийн албан тушаалд томилогдох эрхээ 2.6 жилээр хасуулсан Нийслэлийн Соёл урлагийн газрын дарга асан Э.Цэнд-Аюуш албан тушаал дэвшиж, Засгийн газрын хэрэгжүүлэгч агентлаг Соёл урлагийн газарт томилогдсон нэгэн.  Тодруулбал, Нийслэлийн Соёл урлагийн газрын даргаар ажиллаж байхдаа  П.Отгонбаатар, Э.Мөнхбаясгалан нартай үгсэн хуйвалдаж, МҮОНРТ-ийн бэлтгэсэн контентыг өөрсдөө хийсэн мэтээр хуурамч бичиг, тайлан гаргаж, нийслэлийн төсөвт 108,9 сая төгрөгийн хохирол учруулсан гэх хэрэгт холбогдсон байдаг. 

Улмаар шүүхээс шүүгдэгч Э.Цэнд-Аюушийн нийтийн албанд томилогдох эрхийг 2 жил 6 сарын хугацаагаар хасаж, 6,000 нэгжтэй тэнцэх хэмжээний буюу 6,000,000 /зургаан сая/ төгрөгөөр торгох ял оноосон ч Засгийн газрын хэрэгжүүлэгч агентлагийн Соёл, соёлын өвийн хэрэгжилтийн газрын даргаар томилогдсон том артай хүн л дээ.

Басхүү Ж.Дамдинцэрэнгийн хувьд ч гэмт хэрэг үйлдснийг нь мэдсээр байж, нотлох баримтыг нь нуун дарагдуулбал, хуулийн хариуцлага хүлээх учиртай. Нүүр номонд дэлгэгдсэн нөхөрлөлийн бутрал цаашид хэрхэн өрнөхийг харах л үлдлээ. Өөрөөр хэлбэл, хэрэгт холбогдсон нь нотлогдож, ял сонссон этгээд басхүү ял авахуйц гэм үйлдсэнийг нь мэдсээр байж нуун дарагдуулсан нөхөрт Монголын шүүх ямар зэм оноох бол...

З.УРСГАЛ