"Багануур" ХК-ийн ажилчдын зүгээс “Эрдэнэс Монгол” ХХК болон төрийн гурван өндөрлөгт өнөөдөр шаардлага хүргүүллээ.  Тодруулбал,  энэ сарын 8-9-ний өдрүүдэд "Багануур" ХК-ийн ТУЗ ээлжит бусаар хуралдаж, гүйцэтгэх захирлын үүрэг гүйцэтгэгч Д.Түвшинжаргалыг халах шийдвэр гаргасныг хууль бус, улс төрийн зорилготой шийдвэр гэж үзэж буй тухай бид мэдээлж байсан.

Наадмын өмнө  болсон томилгоог компанид тогтворгүй байдал үүссэн гээд шинэ гүйцэтгэх захирлыг дэмжихгүй. ТУЗ-ийн шийдвэрийг хүчингүй болгох хүртэл эсэргүүцлийн тайван жагсаал зохион байгуулна. Гэхдээ уурхайн үндсэн үйл ажиллагаа доголдохгүй гэж тэд мэдэгдлээ. Мөн “Багануур” ХК-ийн гүйцэтгэх захирлыг хууль бусаар халсaн гээд, хүсэлтийг нь хүлээн авахгүй бол ажил хаяна гэдгээ мэдэгдлээ.

Ямартай ч  уурхайчдын төлөөлөл “Эрдэнэс Монгол” ХХК-ийн гадна цуглаж, эсэргүүцлээ илэрхийллээ. 1200 ажилтнаас 876 ажилтан 41 хуудаст гарын үсгээ зуржээ. Тэд "Уурхайчин хамт олон бид “Эрдэнэс Монгол” ХХК-ийн ТУЗ-ийн 2023 оны 97 дугаар тогтоолоор батлагдсан Гүйцэтгэх захирлын үйл ажиллагааны журмын 3, 6, 8 дугаар зүйлийн холбогдох заалт, “Багануур” ХК-ийн ТУЗ-ийн 2019 оны 14 дүгээр тогтоолоор батлагдсан ТУЗ-ийн үйл ажиллагааны болон хороодын журмын 2-ын 15, 17 дахь заалтыг тус тус зөрчсөн. Ингэснээр компанид тогтворгүй байдал үүсгэн хууль бус шийдвэр гаргах замаар шинэ гүйцэтгэх захирал томилж байгааг эсэргүүцэж байгаагаа илэрхийлж байна. "Багануур" ХК-ийн ТУЗ-ийн 2025 оны долоодугаар сарын 8, 9-ний өдөр ээлжит бусаар хуралдаж тогтоол гаргасныг эсэргүүцэж байгаа. Энэ тогтоолыг хүчингүй болгохыг нийт уурхайчид шаардаж байна. Мөн энэ тогтоолыг хүчингүй болгох хүртэл эсэргүүцлийн тайван жагсаалаас эхлээд ажил хаях хүртэл бүх арга хэмжээг авах болно гэдгээ үүгээр мэдэгдэж байгаа юм.

"Эрдэнэс Монгол" нэгдлээс уурхай энэ оны эхний хагаст ашиггүй ажилласан, хөдөлмөрийн аюулгүй байдлыг хангаагүй гэсэн үндэслэлээр гүйцэтгэх захирлыг халсан гэв. Манай нүүрс өртөгтөө хүрдэггүй, алдагдалтай байдаг. Тэгвэл “Багануур” ХХК 1 тэрбум 758 сая төгрөгийн цэвэр ашигтай ажиллаад байгаа. Үүнийг яагаад хангалтгүй гэж үзээд байгаад ойлгохгүй, хүлээн зөвшөөрөхгүй байна. Чоно борооноор, даргын томилгоо наадмаар гэдэг шиг  ямар ч мэдэгдэл, тайлбар хийхгүйгээр долоодугаар сарын 8, 9-нд ТУЗ хууралдаад тогтоол гаргасан. Хагас жилийн үйл ажиллагааг дүгнэх нэрийдлээр хуралдалдуулсан ч шинэ гүйцэтгэх захирал томилсон. 

Д.Түвшинжаргал нь 2018-2019 онд Багануур ХК-ийн төлөөлөгч, 2019-2022 онд Тэргүүн дэд захирал, 2022 оны 5 сараас Гүйцэтгэх захирлын үүрэг гүйцэтгэгчээр ажиллажээ. Тус уурхай нийслэлийн дулаан хангамжид хамгийн чухал үүрэг гүйцэтгэдэг, ДЦС-уудад нүүрс нийлүүлдэг." хэмээн мэдэгдлээ.