Алт-3 аяныг хэрэгжүүлэх УИХ-ын тогтоолын төслийг батлах санал хураалт явуулж, 53 гишүүн дэмжлээ.  Энэхүү хөтөлбөр нь Монгол Улсын эдийн засгийг дэмжих зорилготой бөгөөд алт олборлогч, үйлдвэрлэл эрхлэгчдэд зээлийн дэмжлэг үзүүлэхээр төлөвлөж байна.

“Алт-3” хөтөлбөрийн гол агуулга:

• Алтны олборлолт нэмэгдүүлэх: Өнгөрсөн онд 18.5 тонн алт олборлосон бол энэ жил 20 тонноор төлөвлөсөн байна. Шороон ордуудыг ашигласнаар алтны хэмжээг 2 тонноор нэмэгдүүлж, ойролцоогоор 1.7 их наяд төгрөгийн орлогыг төсөвт нэмж олох боломжтой гэж үзэж байна.
•  Зээлийн дэмжлэг: Монголбанк болон гадаадын хөнгөлөлттэй зээл тусламжийг ашиглан алтны үйлдвэрлэл эрхлэгч, олборлогчдод зээлийн дэмжлэг үзүүлэхээр төлөвлөж байгаа бөгөөд эхний байдлаар 300 орчим сая ам.долларын эх үүсвэр олж ирж байгаа гэсэн мэдээлэлтэй байна.
• Нөөцтэй ордуудын ашиглалт: 100 орчим тонны нөөцтэй үндсэн ордууд тусгай хамгаалалттай газар нутагт байрладаг бөгөөд эдгээр ордуудыг олборлох асуудлыг тодруулж байгаа.
•  Байгаль орчны нөхөн сэргээлт: Зээлийг нөөц нь тодорхойлогдсон, байгаль орчны нөхөн сэргээлтийг 100 хувь хийх баталгаагаа байршуулж чадах компаниудад олгохоор төлөвлөж байна.

Хөтөлбөр хэрэгжсэнээр Монгол Улсын валютын нөөцийг нэмэгдүүлэх, алтны үйлдвэрлэлийг дэмжих, эдийн засгийн өсөлтийг хангах зорилготой юм.

Энэ онд 18 тонн алт олборлож, унцыг нь 1850 ам.доллароор борлуулан нийт  342.8 тэрбум төгрөг төсөвт төвлөрүүлэхээр баталсан. Харин тодотголоор олборлолтын хэмжээг 17 тонн болгон бууруулжээ. Дэлхийн зах зээл дэх алтны ханш өссөнөөр 2900 ам.доллар болж өссөнөөр 507.6 тэрбум төгрөгийг төсөвт оруулахаар тооцсон байна. Үүнийг ЭЗХЯ-ны дөрөвдүгээр сард хийсэн тооцоололд суурилсан гэдгийг Сангийн яамны эх сурвалж тодотгосон. 

Монгол Улсын ашигт малтмалын нөөцийн нэгдсэн бүртгэлд 105 ордын 572.2 тонн нөөцөөс 347.1 тонн алт буюу 82 үндсэн ордын хүчинтэй тусгай зөвшөөрөл байна. Эдгээрийн 14-ийг тодорхой хэмжээгээр ашиглаж буй бөгөөд 228.7 тонн нөөц бүхий 68 ордыг эдийн засгийн эргэлтэд оруулаагүй байна. Мөн 80.1 тонн нөөц бүхий алтны 13 үндсэн орд улсын тусгай хамгаалалттай газар нутагт, үлдсэн орд болон нөөц нь бусад төрлийн хориглосон, хязгаарласан талбайд хамаарч байна.