Зургаадугаар сарын 24–26-ны өдрүүдэд Дундговь аймгийн Цагаан суваргын ариун дагшин нутагт, Говь Каравансерай аялал жуулчлалын цогцолборт “Сэтгэшгүй оддын чуулган” фестиваль дөрөв дэх жилдээ амжилттай зохион байгуулагдлаа. Энэ бол зочдын сэтгэлд гүн үлдсэн, урлаг ба байгаль, хүн ба сансар огторгуйн нарийн шүтэлцээг мэдрүүлсэн онцгой аялал байв.

Говийн салхины чимээ лугаа адил амгалан энэ фестивалиар дамжуулан зочид зөвхөн түүний сүнслэг мөн чанарыг мэдрээд зогсохгүй, урлагийн хязгааргүй увидасыг зүрх сэтгэлээрээ сонслоо.

“Сэтгэшгүй оддын чуулган” нь Аuthentic Mystical Festival хэмээн тодорхойлогддог бөгөөд уртын дууны өлгий нутаг болох говийн бодгалийг илэрхийлж чаддаг, Монголдоо дахин давтагдашгүй фестивалийн нэг болж танигдсаар байна. Тус фестиваль нь ‘’Аялал жуулчлалыг дэмжих’’ хөтөлбөрийн хүрээнд зохион байгуулагдсан бөгөөд Дундговь аймаг Засаг даргын Тамгын газар дэмжигч байгууллагаар оролцсон.

Хэрэв Сингапурын Сентозаг хүмүүс галын шоу бүхий экзотик наадмаар, Туркийн Истанбулыг Сема бүжгээр төсөөлдөг бол — одоо Монголын уудам говийг “Сэтгэшгүй оддын чуулган” фестивальгүйгээр дүрслэх аргагүй болжээ.

Энэ жилийн фестивалийн кураторууд Д.Ганпүрэв /Ganpurev Dagvan/, Б.Ганхөлөг нар язгуур урлаг, цохивор хөгжмөөр дамжуулан газар нутгийн өвөрмөц орон зайг мэдрүүлэх зорилгоор гурван үндсэн хэсэгт хуваан бүтээжээ.

Фестивалийн эхний өдөр "Sound of Serai" амьд хөгжмийн VIP тоглолтоор эхэлсэн. Үзэгчид Алтай хамтлагийн язгуур урлагийн ур чадварыг бишрэн, “Ятгын хатан хаан” хэмээгдэх МУГЖ Ч.Мөнх-Эрдэнийн говийн ус шиг тунгалаг тоглолтоос онцгой мэдрэмж авчээ. Д.Ганпүрэв Алтайн магтаал хайлж, зочдын сэтгэлийн нарийн чавхдасыг хөндөж, Б.Ганхөлөг UB Drums хамтлагийнхантай хамт фестивалийн эрчийг өргөж, бөмбөрийн хэмнэлээр сэтгэл сэргээхийн сацуу ханг бөмбөрийнхөө эгшигт аялгуугаар огторгуйн хоосон чинад руу хөтөлсөн юм.

Түүнчлэн, фестивалийн кураторууд Бөртэ хамтлагийнхаа дурсамжийг сэргээн, гурвуулаа хамтдаа аялгуу өргөсөн нь олны сэтгэлийг хөдөлгөсөн.

Фестивалийн хоёр дахь хэсэгт үүлс сарнин өнгөрч, шөнийн тэнгэрийн ивээл дор жинхэнэ утгаараа “сэтгэшгүй оддыг” тольдох боломж олдсон. Энэхүү орой Dark Sky Mongolia байгууллагын үүсгэн байгуулагч, мэргэжлийн од тайлбарлагч Б.Энхтүвшин тэнгэрийн заадас, гариг эрхсийг зочдод танилцуулж, оддын үлгэр домгийн аялалд хөтөлсөн нь зочдын сэтгэлд мартагдашгүй мэдрэмж төрүүлсэн юм.

Фестивалийн дараах хэсэг тал газрын хязгааргүйн гүнд орших нэрт уран бүтээлч А.Очирболдын арван гурван “Ухамсар” бүтээл дунд өрнөсөн Аваргасын тойрон бүжиг байлаа. Оролцогчид маань эртний 32 хүний тойрон бүжгийн сүг зурагнаас эх ундаргаа нь авсан бүжгийн хэмнэлээр түүдэг галын дөлөнд өвөг дээдсийнхээ зан үйлийг мэдэрч, бие сэтгэлээрээ байгаль орчинтойгоо нэгдсэн юм. Аваргасыг санагдуулам “Ухамсар” бүтээлүүд үлэг гүрвэлүүдийг агнан намнаж байсан эртний үлэмж биетнүүдийн зэрэглээ мэт ертөнц рүү хөтөлж, ер бусын дүр зураглалыг мэдрүүлсэн.

Фестивалийн дараагийн өдөр уран бүтээлчид байгальдаа хүндэтгэл үзүүлэн, Дэл уулын байгалийн ил галерейд хүрэлцэн очиж, дуу хуураараа талархлын зан үйл үйлджээ. Тэдэнтэй хамт явсан зочдын сэтгэл огшиж, "орчлон хорвоог туулах их засал болов" хэмээн өгүүлжээ.

"Сэтгэшгүй оддын чуулган" зохион байгуулагдсан сүүлийн дөрвөн жилийн өдрүүдийн үеэр байгаль эх хур бороогоо энэрэнгүй хайрлаж, хүмүүн олонтой хамтдаа баясан цэнгэдэг уламжлалтай. Тус гайхалтай үзэгдэл нь энэхүү фестивалийн “нууцлаг буюу mystical” шинж чанарыг илтгэх нэгэн тод илэрхийлэл билээ.

Энэ бүхний дурсамж одны тоосонцор мэт зүрх сэтгэлд манан татан үлдэх энэ цаг мөчид, бид дараах учралыг зөгнөн хүсэн хүлээж байна. Сэтгэшгүй олон оддын доорх энэхүү ид шидийн аялалд нэгдэх боломж танд ч бас тун удахгүй бүрдэнэ.