Сэлэнгэ аймгийн засаг дарга өчигдөр А/333 тоот захирамж гаргаж, 6 дугаар сарын 25-ны өдрөөс эхлэн аймгийнхаа хэмжээнд гамшгаас хамгаалах өндөржүүлсэн бэлэн байдлын зэрэгт шилжүүллээ. Улсын хэмжээнд өчигдөр өглөө 6 түймэртэй байсан бол орой 13 болж нэмэгдсэн юм. Үүний 5 нь Сэлэнгэд гараад байна. Эдгээр нь бүгд ойд дэгджээ.

Тодруулбал:

• Алтанбулаг сумын Цөх 3-р баг Доргонтолгойд ойн түймэр,
• Цагааннуур сумын Оргих 1 дүгээр баг Товхонхан уулын ар Хоорондын аманд ойн түймэр,
• Ерөө сумын Буурагчин 2 дугаар баг Даваат гэдэг газар ойн түймэр,
• Ерөө сумын Буурагчин 2 дугаар баг Ялбагийн Асгатын аманд ойн түймэр,
• Түшиг сумын Жаргалмандах 1 дүгээр багийн Самданшовход ойн түймэр

Ойн түймрийн голомтод ОБЕГ-ын Гал түймэртэй тэмцэх газрын дарга, хурандаа Ц.Нямбаяр, Сэлэнгэ аймгийн Онцгой байдлын газрын дарга, хурандаа С.Пүрэвсамдан нараар ахлуулсан Үндэсний аврах бригад, НОБГ, Сэлэнгэ, Дархан-Уул, Орхон, Булган аймгийн Онцгой байдлын газрын алба хаагчид, Алтанбулаг, Түшиг, Цагааннуур, Мандал, Ерөө сумын ЗДТГ, сумдын мэргэжлийн анги, Тужийн нарсны байгалийн цогцолборт газрын хамгаалалтын захиргааны болон орон нутгийн иргэд ажиллаж байна.

Гамшгаас хамгаалах өндөржүүлсэн бэлэн байдлын зэрэгт шилжсэнтэй холбоотойгоор тус аймгийн сумдын Онцгой комисс өчигдөр шуурхай хуралдан, гамшгаас хамгаалах өндөржүүлсэн бэлэн байдлын зэрэгт шилжлээ. Үүнтэй холбоотойгоор түймрийн мэргэжлийн анги, алба, хүн хүч, нөөц, техник хэрэгслийн бэлтгэл бэлэн байдлыг хангаж байна.