Нийслэлийн хамгийн урт гүүр гэх тодотголтой олны нэршсэнээр Яармагийн гүүр буюу албан ёсны хэллэгээр бол Наадамчдын авто замаас Энхтайваны өргөн чөлөө хүртэлх 78,9 тэрбум төгрөгийн өртөг бүхий 780 метр урт гүүр барих тендерийг 2022 онд Нийслэлийн худалдан авах ажиллагааны газраас зарлажээ. 2023 оны 10 дугаар сарын 01-ний өдөр хүлээлгэж өгөх уг тендерт 5 компани өрсөлдсөнөөс “Мотор сервис” ХХК шалгарсан ч ажлаа бүрэн хүлээлгэж өгөлгүй, элдэв шалтаг хэлж, бүрэн гүйцэд хийлгүй хойшлуулсаар өнөөдрийг хүрсэн билээ.

Хамгийн ноцтой нь, анх дөрвөн хэсэг бүхий 780 метр урт гүүр барихаар тооцооллоо ирүүлж, тендерт шалгарсан атлаа өнөөдөр 483 метр урт гүүр хүлээлгэж өгч, 17,7 тэрбум төгрөгөөр хийх ёстой 150 метр урт гүүр нь хаашаа алга болсныг хэлэх хүн байтугай хариуцах хүн олдохгүй байна.

Энэ талаар эрэн сурвалжилж, Нийслэлийн Замын хөгжлийн газрын дарга Б.Одбаяраас тодруулахад "Магадлалыг нь харахаар 750 м урт гүүр гэж байгаа боловч зураг төслийг нь харахаар  483 м урт гүүр болчихож байгаа юм. Тухайн үед замын урд хэсэгт явж буй трасс нь өөдөө тэмүүлэх гүүрийн трасстай давхцсан учраас тэр гүүрийг түр замаар шийдээд, тэгж байгаад гүүрийн асуудлыг оруулж ирнэ гэсэн яриатай байсан юм билээ” гэж сарын өмнө сэтгүүлчдэд өөрийн амаар хэлж байлаа. Гэтэл тендерийн шалгуурт зааснаар, 780 м урт гүүр нь 391 м, 150м, 54 м, 36 м урт дөрвөн хэсэг бүхий төмөр бетон гүүр бөгөөд энэ нь ч гүүрийн зураг төслийг гүйцэтгэсэн “ГБЭТ” ХХК-ийн экспертизийн дүгнэлт болон  Зам тээврийн хөгжлийн төвийн магадлалын ерөнхий дүгнэлтээр тус тус баталгаажиж байгаа юм. Энэ тооцооллын дагуу ч тендер зарлагдаж, улмаар “Мотор сервис” ХХК шалгарсан аж.

 Өнгөрсөн жил орон нутгийн сонгуулийн өмнө хэл амтайхан нээлтээ хийсэн Яармагийн гүүрээс ийнхүү 17,7 тэрбум төгрөгийн өртөг бүхий 150 м урт гүүр нь алга болчихоод байхад эрэл сурал тавьж буй эрх мэдэлтэн алга.

Харин энэ гүүрийн асуудлыг хууль хяналтын байгууллага шалгаж байгаа эсэх асуудлаар Нийслэлийн замын хөгжлийн газраас нэхэн сурвалжилсан юм. Харамсалтай нь, төсвийн мөнгөнд хяналт тавьж ажиллах ёстой тус газрын дарга Б.Одбаяр сарын өмнө ярьж байсан үгээсээ буцаж, “Эхнээсээ л 3 гүүр бүхий тендер зарласан, тэгээд ч намайг энэ ажлыг авахад баригдаж дууссан байсан гүүр” хэмээн хариуцлагаас зугтахыг санаархаж байна.  Уг нь өмнөх даргаас илүү ажил сайжруулах зорилгоор томилогдож ирсэн бол хэн буруутай этгээдэд хариуцлага тооцуулж, төсвийн мөнгөнд хяналт тавих ёстой баймаар. Бүхэл бүтэн 150 м урт гүүрийн мөнгө болох 17,7 тэрбум төгрөг хэний халаасанд орчихов? Тендер нэрээр төсвийг цөлмөгч ийм албан тушаалтнуудад хэзээ төр төмөр нүүрээ харуулах ёстой вэ?  

Ц.ЦОЛМОН