Төрийн байгууллагын үйл ажиллагааг иргэдэд хүртээмжтэй, ил тод байлгахад иргэдийн оролцоог хангах, тэдний дуу хоолойг сонсох, асуудлыг шийдвэрлэх зорилгоор “Асуудал шийдэл” уулзалтыг бүх сумдад зохион байгуулах хуваарийн дагуу Дундговь аймгийн Засаг даргаар ахлуулсан ажлын хэсэг өнгөрсөн тавдугаар сарын 11-нээс эхлэн сумдад ажиллаж байгаа юм.  

Дундговь аймгийн Засаг дарга С.Мөнхчулуун иргэдтэй хийх уулзалтыг тохиолдуулан сумын иргэдэд төрийн үйлчилгээг газар дээр нь хүргэх зорилгоор Татварын газар, Улсын бүртгэлийн хэлтэс, Газрын харилцаа, барилга, хот байгуулалтын газар, Хөдөлмөр, халамжийн үйлчилгээний газрын албан хаагчдыг сумдад ажиллуулан иргэдэд нэг цэгийн үйлчилгээг хүргэхээс гадна дотор, уламжлалт анагаах ухаан, шүд, эмэгтэйчүүд, эхо, рентгин, сүрьеэ, хүүхдийн чиглэлээр аймгийн Нэгдсэн эмнэлгийн нарийн мэргэжлийн эмч нар эрүүл мэндийн үзлэг, оношилгоо, эрт илрүүлгийн үйлчилгээг иргэдэд үзүүлж, нүүдлийн клиник сум бүрд ажиллан Лабораторын үйлчилгээг газар дээр нь үзүүлж байна.

Энэ үеэр сумын иргэдэд аймгийн Засаг даргын үйл ажиллааганы хөтөлбөр болон долоон дэд хөтөлбөрийн талаар аймгийн Засаг даргын орлогч Ц.Ариунбаяр танилцууллаа.  Мөн сумын орон нутгийн хөгжлийн сангийн хөрөнгөөр хийж гүйцэтгэх ажлын саналаа хэрхэн өгөх, шинэ хоршоо, дундын хоршоо байгуулах ач холбогдлын талаар холбогдох албан тушаалтнууд мэдээлэл хийлээ.

Иргэдийн уулзалтад 100 орчим иргэд хүрэлцэн ирсэн бөгөөд Газрын харилцааны чиглэлээр - 84, Таварын үйлчилгээг - 31, Улсын бүртгэлийн чиглэлээр – 21, иргэд үйлчилгээ авсан бол нарийн мэргэжлийн эмч нарын нийт үзлэгт 316 иргэн хамрагдсанаас 217 иргэн шинжилгээнд хамрагдаж, төрийн үйлчилгээг нийт 452 иргэнд газар дээр нь очиж хүргэжээ. Тус суманд ажиллах үеэр аймгийн Засаг дарга С.Мөнхчулуун сумын Засаг дарга А.Жавхлангийн хамт сургууль, цэцэрлэг зэрэг байгууллагуудын үйл ажиллагаатай танилцсан юм.

Өлзийт сумын иргэдтэй хийсэн уулзалтад төрийн байгууллагад хүний нөөцийн дутагдалтай байдал, шилжин ирж ажиллагсдад амьдрах байрны асуудал хүндрэлтэй байгаа, уул уурхайн ААН-үүд сум, багтай хамтран ажилладаг байх, хариуцлагатай байх, сумандаа газар авах гэхээр дуудлага худлдаанд оруулна гэж байгаа нь иргэдэд хүндрэлтэй байгаа, малчин кемп ажиллахаар бол хариуцлагатай ажиллах шаардлагыг тавих, ченж нар үйлдвэрлэл үйлчилгээ явуулах, Багийн Засаг дарга нар хоггүй болохын төлөө шат шатандаа хариуцлагатай ажиллах, хогоо ил задгай хаясан иргэдэд хариуцлага тооцдог болох зэрэг санал хүсэлтээ илэрхийлжээ.