2025 оны зургадугаар сарын 7-ны өглөөний 04:30 цагт Улаанбаатар хотын Хан-Уул дүүргийн Жаргалантын аманд байрлаж байсан морьт харвааны багийн 18 хүлэг морь хулгайд алдагдсан. Харамсалтай нь морьдыг бүгд нядлагдсан гэх таагүй мэдээ батлагдсан. Эл хэргийн улмаас энэ бол мал хулгайлах явдал бус,  Монголын үндэсний бахархал, өв соёл, уламжлалт спортын эсрэг үйлдэгдсэн гэмт хэрэг.  Морьт харваа гэдэг Монголын түүх, язгуур соёлын салшгүй хэсэг. ЭНэ бол үндэсний өв уламжлал, дархлааны эсрэг гэмт хэрэг гэж үзэгсэд мсошиалд орчинд байр сууриа илэрхийлсээр буй.

Яг энэ үед Монголын Морин Спорт, Уяачдын Холбоо морьт харваачдад морь хандивлах аянг эхлүүлж байгаагаа албан ёсоор эхлүүлснээ мэдэгдсэн. Уг аяны эхлэл болгон Монгол Улсын тод манлай уяач, ММСУХ-ны дэд ерөнхийлөгч П.Энхмөнх гурван адуу, Хөвсгөл аймгийн Мөрөн сумын иргэн Ц.Хуншагай хул зүсмийн адуу, Х.Мөнхжин халзан даага, Макс Группийн Ерөнхийлөгч Д.Цэрэнжигмэдийн охин Нинжбадам макс угшлын таван морь, Тэнгэрийн нүүдэлчид төслийн залуус хоёр морь, УИХ-ын гишүүн Д. Батбаяр нэг адуу бэлэглэж, сэтгэлийн дэм болж байгаагаа илэрхийлж өөрсдийн цахим хуудаснаа бичсэн билээ.

Аян үргэлжилсээр байгаа бөгөөд МАН-ын Ерөнхий нарийн бичгийн дарга Я.Содбаатар морьт харвааны залуустаа 2018 оны улсын наадмын түрүү, төвийн бүсийн түрүү, 2019 онд улсын наадмын зургаа, Баянхонгор бүсийн уралдаанд айрагдсан хурдан хонгор азарганыхаа төл шүдлэн үрээг бэлэглэж буйгаа цахим хуудсаараа дамжуулан мэдээллээ.

Дэлхийд гайхагдсан Монгол адуун соёлоо түгээн дэлгэрүүлэх, олон түмнийг баясуулан цэнгүүлэх үйлс нь үеийн үед дэлгэрч байх болтугай. Та морь хандивлахдаа ММСУХ-ны Ажлын албаны 88073024 дугаарт холбогдон мэдээлэл авч бүртгүүлээрэй. Морьт харвааны дайчин залуус, тэдний аргамаг хүлгүүд Монгол адууны өв соёлыг эх орондоо төдийгүй дэлхийд гайхуулсан бахархам түүхийн эзэд. Түүх тасралтгүй үргэлжлэн бичигдэх учиртай.