Нэгэнт шинэ Ерөнхий сайдтай болж, сайдуудын томилгооноос үүдэлтэй эрх баригч намынхан дотооддоо алалцаад эхэлсэн. Хөндлөнгөөс ч гар хуруугаа дүрж байгаа бололтой. Дотоодын “дайн” хэзээ  дуусна, тэр цагт шинэ Засгийн газар бүрдэнэ. Гэтэл сайдын “дайн”-аас гадна Засгийн газрын бүтэц бүрэлдэхүүн, салбарын сайдуудын багцад байдаг агентлаг газарт сайдаасаа илүү эрх мэдэлтэй авлигачин, тендерчин, албан тушаалын наймаачид байгааг хэрхэвч мартаж болохгүй.

Тэдний нэг бол Ерөнхий сайд асан Л.Оюун-Эрдэнэ өөд нь татаж гаргаж ирсэн “Багануур” Зүүн Өмнөд Бүсийн Цахилгаан Түгээх Сүлжээний дарга Х.Ганчулуун юм. Анх түүнийг аймгийн ИТХ-ын суудлаас Улаанбаатар цахилгаан түгээх сүлжээ Төрийн өмчит компанийн Тэргүүн дэд захирлаар дэвшүүлэн томилуулж, тус газрын Хангах үйл ажиллагааны бодлого, хэрэгжилтийн хэлтсийн даргаар ажиллуулж байгаад “Багануур” Зүүн Өмнөд Бүсийн Цахилгаан Түгээх Сүлжээний даргаар томилоод хэдэн сар болжээ. Ингэхдээ цахилгаан сүлжээний хуучин даргыг нь үндэслэлгүйгээр ажлаас нь халуулсан маргаан ч байдаг. Аргагүй том татаастай, хүчтэй байсан үе л дээ. 

Хамгийн гол нь тэр Улаанбаатар цахилгаан түгээх сүлжээ Төрийн өмчит компанийн Тэргүүн дэд захирлаар томилогдсоныхоо дараа эхнэр Б.Баяржавхлангийн нэр дээр “Ар хөв энерги” компанийг байгуулж, тендер хамаад эхэлжээ. Тэгэхээр түүний зөвхөн Улаанбаатар цахилгаан түгээх сүлжээнд ажиллах богино хугацаанд хамсан тендерүүдийн жагсаалтыг харъя.  

1.2024 он Багануур зүүн өмнөд бүсийн цахилгаан түгээх сүлжээ ТӨХК дамжуулагч утас АС 113 сая төгрөг

2.2024 он Багануур зүүн өмнөд бүсийн цахилгаан түгээх сүлжээ ТӨХК дамжуулагч утас СИП 242 сая төгрөг

3.2024 он Хэнтий аймгийн Галшар сумын гэр хороололын гэрэлтүүлэг нэмэгдүүлэх 0,4 квтын агаарын шугамын өргөтгөл 131 сая

4.2023 он Хэнтий аймгийн Хэрлэн сум, Булаг багийн цахилгаан хангамжийн шинэчлэл, гэрэлтүүлэг 617 сая

5.2024 он Хэнтий аймгийн Хэрлэн сумын хийдийн 1.2 км авто замын гэрэлтүүлгийн ажил 150 сая

6.2024 он Чингис хотын хаалга өртөө 240, эко нойлын цахилгаан хангамжийн ажил 67.3 сая

7.2024 он Хэнтий аймгийн Хэрлэн сум, гэр үйлчилгээний газрын цахилгаан хангамжийн ажил 26.5 сая

8.2024 он Төв аймгийн төвд баригдаж байгаа дулааны станц төслийн цахилгаан хангамж, дэд бүтэц 313 сая төгрөгийн тендерт тус тус шалгарчээ.

Ийнхүү орон нутгаас ирсэн нэг хурган дарга ажлаа хийхээсээ илүүтэй хумслах, завших аргад асар хурдан суралцаж дэвшсээр байгааг шинэ засгийн тэргүүн, шинээр очих Эрчим хүчний сайд анхааралдаа авахгүй бол танхимын чинь нэр нүүрийг бараад зогсохгүй давхар хариуцлагад ч орж мэдэхээр газар авчихсан байгааг анхааралдаа авч, зөв хүнээ томилох хэрэгтэй.

Ц.Цэнгэл